དྲ་རྒྱ་བཟོ་བཀོད་པ་བསོད་ནམས་འོད་ཟེར།
མིག་གཅིག་གིས་རང་ཉིད་ལྟ་དགོས།
རྒྱ་ནག་གི་རྩོམ་པ་པོ་ཀྲང་ལེན་གྱིས་བརྩམས། མིག་དམར་ཆོས་སྒྲོན་གྱིས་བསྒྱུར།
ཉེ་རབས་ཉི་ཧོང་གི་གྲི་རྩལ་མཁས་པའི་ཁྲོད་སྙན་གྲགས་ཅན་གཉིས་ནི་ཀུང་བན་ཨི་ཙང་དང་ལུའུ་ཧྲན་ཡུ་ཐཱ་གཉིས་རེད། ཀུང་བན་ནི་ལུའུ་ཧྲན་གྱི་དགེ་རྒན་རེད། ཐོག་མར་ལུའུ་ཧྲན་གྱིས་ཀུང་བན་དགེ་རྒན་ལ་བསྟེན་དུས། ལུའུ་ཧྲན་གྱིས་རྒན་ལགས་ངས་ལོ་ག་ཚོད་ལ་གྲི་རྩལ་སྦྱངས་ན་ཕུལ་དུ་བྱུང་བའི་གྲི་རྩལ་པ་ཞིག་ཆགས་ཀྱི་རེད། ཅེས་དྲིས་པར། དགེ་རྒན་ཀུང་བན་གྱིས་ཉུང་ཤོས་ལའང་ལོ་བཅུ་དགོས་ཀྱི་རེད། ཅེས་ལན་བརྒྱབ་པ་རེད། ལུའུ་ཧྲན་གྱིས་ཡང་བསྐྱར་ངས་དཀའ་སྤྱད་འབད་བརྩོན་བྱས་ན་ག་ཚོད་འགོར་གྱི་རེད། ཅེས་དྲིས་པར། ཀུང་བན་གྱིས་ཕལ་ཆེར་ལོ་ཉི་ཤུ་དགོས་ཀྱི་རེད། ཅེས་བཤད་པ་རེད། ལུའུ་ཧྲན་ཡ་མཚན་ནས། འོ་ན་ང་དགོང་མོ་མ་ཉལ་བར་སྦྱངས་ན། ཞེས་དྲིས་པར། ཀུང་བན་གྱིས། སྐབས་དེ་དུས་ཁྱེད་རང་སེམས་མེད་བེམ་པོ་ཞིག་ཏུ་འགྱུར་བ་ལས་གྲི་རྩལ་པ་ཞིག་ཏུ་རྩ་བ་ནས་འགྱུར་སྲིད་ཀྱི་མ་རེད། ཅེས་ལན་བརྒྱབ་པར། ལུའུ་ཧྲན་ཧང་སངས་ནས། ག་རེ་བྱས་ནས། ཞེས་སྐད་ཆ་དྲིས། ཀུང་བན་གྱིས་ངག་འཇམ་པོའི་ངང་ནས། ཕུལ་དུ་བྱུང་བའི་གྲི་རྩལ་པ་ཞིག་བྱེད་དགོས་ན། ནམ་ཡང་མིག་གཅིག་གིས་སོ་སོའི་བདེ་འཇགས་ལ་ལྟ་དགོས། སོ་སོར་དྲན་གསོ་བྱེད་དགོས། ངས་བསམ་ན། ད་ལྟ་ཁྱེད་ཀྱི་མིག་གཉིས་ཀྱིས་གྲི་རྩལ་བའི་མིང་བྱང་དེར་མ་གཏོགས་སོ་སོ་རྩ་བ་ནས་མཐོང་གི་མི་འདུག ཁྱེད་ཀྱིས་རང་ཉིད་མཐོང་གི་ཡོད་དམ། ཞེས་དྲིས་པས། ལུའུ་ཧྲན་ངོ་ཚ་ཁ་སྐྱེངས་ངང་ལུས་པ་དང་དེ་ནས་བཟུང་དགེ་རྒན་གྱི་བཀའ་རྩིས་ནས་གྲི་རྩལ་སྦྱངས་པས་ཁོ་རང་ཉིད་ཀྱང་ཕུལ་བྱུང་གི་གྲི་རྩལ་པ་ཞིག་ཏུ་གྱུར་བ་རེད། གྲི་རྩལ་ནི་དཔེ་མཚོན་ཙམ་ཞིག་ཡིན། མིའི་མི་ཚེ་ཡང་གྲི་རྩལ་པ་ཞིག་དང་གཉིས་སུ་མ་འདས། དེ་ན་གལ་ཏེ་མིག་གཉིས་ཀྱིས་ཕུགས་བསམ་ཞིག་དང་རེ་བ་ཞིག་ལ་ཅེར་ནས་བསྡད་ན། སེམས་ཁམས་བཙོན་ལ་འཇུག་རྒྱུ་སྨོས་མེད་རེད་ལ། རང་ཉིད་གནས་སྡོད་བྱེད་ས་གསལ་བོ་མི་མཐོང་བས་མ་ཚད་མཐའ་འཁོར་ལ་འགྱུར་བ་གང་ཞིག་འགྲོ་གི་ཡོད་པའང་རྟོགས་མི་སྲིད། དེའི་མཇུག་འབྲས་ནི་ཕམ་ཁ་དང་དཀའ་སྡུག་ཁོ་ན་ཡིན། གནས་གང་ཞིག་དང་དུས་ནམ་ཞིག གནས་སྟངས་གང་འདྲ་ཞིག་གི་འོག་མིག་གཅིག་གིས་རང་ཉིད་ལྟ་རྒྱུ་མ་བརྗེད་པ་བྱེད་དགོས།
རོགས་སྐྱོར་པ།
སའི་གོ་ལ་འདིའི་སྟེང་མི་འདྲ་མིན་སྣ་ཚོགས་ཡོད་པ་ལས་ལ་ལ་ངོ་མ་སྙིང་རེ་རྗེ། ང་ཚོས་ཁོང་ཚོའི་མིང་ལ་རེ་བ་ཅན་ཟེར་གྱི་ཡོད། ཁྱོད་ཀྱིས་ཀྱང་མི་དེ་འདྲ་ངོ་ཤེས་རྒྱུ་རེད། མི་དེ་ཚོས་རང་ཉིད་ལ་ཤུལ་བཞག་རྒྱུ་ནོར་མང་པོ་ཞིག་ཐོབ་ཆེད། རྒྱུ་ཡོད་པའི་ཕ་མ་སྤུན་མཆེད་གྲོངས་པའི་རེ་བྱེད་ཀྱི་ཡོད། ཡང་ཁོང་ཚོས་ཉིན་ཞིག་ལམ་ཁར་འགྲོ་སྐབས་ཁུག་མ་ཆེན་པོ་ཞིག་གི་ནང་དངུལ་མང་པོ་བླུགས་པ་ཞིག་རྙེད་པའི་རེ་བ་བྱེད་ཀྱི་ཡོད། ཡིན་ནའང༌། དངུལ་ལོར་ལ་ཡིད་ཚིམ་པའི་ནུས་པ་མེད་ཁོང་ཚོས་ཤེས་ཀྱི་མེད། མི་དེ་ཚོ་མཚོ་ཁར་སླེབས་སྐབས་རང་ཉིད་ཀྱི་གྲུ་གཟེངས་ཆུ་ཕ་རོལ་དུ་རྩ་བ་ནས་ཕྱིན་མེད་པ་ཤེས་ཀྱི་ཡོད་མོད། ཡིན་ནའང། གྲུ་གཟེངས་ཆེན་པོ་ཞིག་མཚོ་འགྲམ་དུ་སླེབས་པའི་རེ་བ་བྱེད་ཀྱི་ཡོད། མི་དེ་དག་ནི་ཉམ་ཐག་སྙིང་རྗེ་སྐྱེས་དགོས་པ་ཞིག་ཡིན་ཡང་ཁོང་ཚོར་ནུས་པ་མེད་པ་མིན། ཁོང་ཚོས་ནུས་པ་བེད་སྤྱོད་བྱེད་ཀྱི་མེད། རེ་བ་ཅན་དེ་དག་གིས་མགོ་བོ་མར་སྒུར་ནས་རང་ཉིད་ཀྱི་ཕུར་ཁ་ལ་གང་ཞིག་ཡོད་མེད་ལྟ་ཤེས་ཀྱི་མེད། ངོ་མ་ཁོང་ཚོར་རོགས་རམ་བྱེད་མཁན་དེ་དེར་ཡོད་པ་ཤེས་ཀྱི་མེད། དུས་རྟག་ཏུ་ཕུ་ཐུང་ན་ཡོད་པའི་ལག་གཉིས་དེ་བདེ་སྤྱོད་ལེགས་པར་བྱས་ན། རྨི་ལམ་ཙམ་དུ་བསམ་པའི་ཕུགས་བསམ་དང་རེ་བ་མང་དག་ཅིག་དོན་དངོས་སུ་འགྱུར་སྲིད།
ཁོང་ཁྲོའི་ཁུག་མ།
སློབ་ཆེན་སློབ་མའི་མཐར་ཕྱིན་མཛད་སྒོའི་ཉིན་སྔོན་མར། ང་ཚོའི་རྒན་ལགས་ཀྱིས་ང་ཚོར་སྒྲུང་འདི་འདྲ་ཞིག་གསུངས་བྱུང༌། གནའ་རབས་ཀྱི་ལྷ་སྒྲུང་ཞིག་གི་ནང་དཔའ་བོ་ཞིག་ཡོད། ཁོང་གི་མིང་ལ་ཧའེ་ལོ་ལི་སི་ཟེར་གྱི་ཡོད་པ་རེད། ཉིན་ཞིག་ཁོང་རི་ལུང་ཐང་བརྒལ་ནས་འགྲོ་སྐབས། དངོས་པོ་ཞིག་རྐང་པར་ཐོགས་པས་དེ་ལ་རྡོག་ཐོ་ཞིག་བརྒྱབ། དངོས་པོ་དེར་སེམས་ཡོད་པ་ལྟར་ཕར་ཙམ་ཕྱིན་མེད་པར་མ་ཚད་སྔོན་མ་ལས་ལྡབ་ཁ་ཤས་ཀྱི་ཆེ་རུ་ཕྱིན་པ་རེད། ཧའེ་ལོ་ལི་སི་ཁོང་ཁྲོ་ལངས་ནས་དབྱུག་པ་ཆེན་པོ་ཞིག་གིས་དངོས་པོ་དེ་ལ་རྡུང་བས་དངོས་པོ་དེ་སྔོན་མ་ལས་ཇེ་ཆེར་ཕྱིན་ནས་ཁོང་གི་ལམ་བུ་ཡོངས་སུ་བཀག་པ་རེད།
སྐབས་དེ་དུས། གྲུབ་ཐོབ་པ་ཞིག་སླེབས་ནས། ཧའེ་ལོ་ལི་སི་ལ་དེ་ནི་ཁོང་ཁྲོའི་ཁུག་མ་རེད། དེ་ལ་མ་ཐུག དེ་བརྗེད་དུ་བཅུག དེ་དང་ཐག་རིང་དུ་སྡོད། དེ་རང་སར་བཞག་ན་སྔོན་མ་ལྟར་ཆུང་དུ་གནས་ཐུབ། དེ་ལ་ཁ་ཡ་བྱས་ན་དེ་ཇེ་ཆེ་ནས་ཇེ་ཆེར་གྱུར་ནས་རང་ཉིད་ཀྱི་མདུན་ལམ་ཡོངས་སུ་འགོག་སྲིད། དགྲ་ཟླ་བཟོད་གསོལ་ཞེས་གསུངས་པ་རེད། སྐབས་དེ་དུས་ང་ཚོའི་རྒན་ལགས་ཀྱིས་དབུགས་རིང་ཞིག་བཏང་ནས། མ་འོངས་པར་ཁྱོད་ཚོ་སྤྱི་ཚོགས་སྟེང་བསྐྱོད་སྐབས། གཞན་དང་རྙོག་དྲ་ཁོང་ཁྲོ་ཡོང་མི་སྲིད་པ་མེད། འོན་ཀྱང་ཁྱེད་ཚོའི་རང་གི་བསམ་བློའི་ཁུག་མའི་ནང་བཟོད་པ་དང་བསམ་ཤེས་བླུགས་ཡོད་པ་མ་བརྗེད་པར་གྱིས།
དེ་འདྲ་བྱས་ན་ཁྱེད་ཚོ་གྲུབ་འབྲས་ཀྱི་གོ་སྐབས་ཤིག་མང་དུ་ཕྱིན་ནས་འགག་རྡོ་ཞིག་ཉུང་དུ་གཏོང་ཐུབ། དེ་མ་གཏོགས་ལེགས་གྲུབ་ཀྱི་ལམ་ཀ་མ་ཤི་བར་དུ་འགག་གི་རེད། ཅེས་གསུངས་བྱུང༌།
རེད་ཡ། མི་དང་མིའི་བར་ཕོག་ཐུག་དང༌། ང་རྒྱལ། ཕྲག་དོག འཁོན་སེམས། འགྲན་སེམས་སོགས་ཁོན་ཁོན་ཐོག་ཐོག་ཡོང་མི་སྲིད་པ་མེད་ཀྱང༌། གལ་ཏེ་ཁྱེད་ཀྱི་ཕྲག་པར་ཁོང་ཁྲོའི་ཁུག་མ་འཁྱེར། སེམས་ནང་ཁོང་ཁྲོའི་ཁུག་མ་ཉར་ནས་མི་ཚེའི་ལམ་བུར་བསྐྱོད་ན། ཁྱེད་ཀྱི་འཚོ་བའི་ཁུར་བོ་རི་རབ་ལས་རི་རབ་ལས་ལྗི་བར་གྱུར་ནས་གོམ་སྟབས་ཀྱང་སྤོ་དཀའ་བར་གནས་སྲིད།
མི་ཚེ་ནང་གི་ལམ་སྒྲོན་གསུམ།
རྒྱ་རིགས་རྩོམ་པ་པོ་ཀྲང་ལིང་གྱིས་བརྩམས། མིག་དམར་ཆོས་སྒྲོན་གྱིས་རྒྱ་ཡིག་ལས་བསྒྱུར། དུས་རབས་ཉི་ཤུ་པའི་དུས་དཀྱིལ་ཙམ་ལ། རྒྱ་ནག་ཏུ་ཕུལ་དུ་བྱུང་བའི་སློབ་ཆེན་གྱི་སློབ་སྤྱི་ཞིག་ཡོད། སློབ་གྲྭ་དེར་ལོ་ལྟར་སློབ་མ་མང་པོ་བསྡུ་བཞིན་ཡོད་པས། ཁོང་ལ་ལྐོག་རྔན་ཕུལ་མཁན་དང་སྤྲེལ་ལད་འཁྲབ་མཁན་ཡང་མང་པོ་བྱུང༌། འོན་ཀྱང༌། ཁོང་གིས་ཁྱིམ་བདག་རྣམས་ལ་ཐུགས་རྗེ་ལེགས་འབུལ་ཞུ་བ་ལས། ལྐོག་རྔན་གཏན་ནས་བླངས་མྱོང་མེད། ཉིན་ཞིག་སློབ་སྤྱི་ཕྱི་རོལ་དུ་བསྐྱོད་སྐབས་ཁྱིམ་བདག་ཅིག་གིས་རིན་གོང་ཆེ་བའི་ཇ་སྐམ་ཤོག་ཁུག་ཅིག་དང་ཐ་མག་སྒམ་གཉིས་ཁོང་གི་ཁྱིམ་དུ་བསྐྱལ། ཁོང་ཕྱིར་ཕེབས་རྗེས་ལྐོག་རྔན་སྤྲོད་མཁན་གྱི་ཁྱིམ་བདག་དེའི་སྡོད་གནས་གསལ་པོར་བརྟག་ནས་དངོས་པོ་དེ་དག་གི་རིན་གོང་ཁྲོམ་རའི་གཅིག་མཚུངས་ལྟར་སྦྲགས་ཁང་བརྒྱུད་ནས་ཕྱིར་བསྐུར། ཁོང་ལ་མི་གཞི་བཟང་པོ་དེ་འདྲ་ཡོད་པས། བརྩི་བཀུར་དང་དད་གུས་བྱེད་མཁན་གྲངས་ཀྱིས་མི་ལོངས་པ་ཡོད། ཁོང་གིས་མི་ཚེ་ལ་མཇུག་སྡོམ་འདི་འདྲ་ཞིག་བརྒྱབས་འདུག མི་ཚེའི་ལམ་བུར་མི་གཞི་བཟང་པོའི་འོད་སྟོང་འཕྲོས་ནས་མདུན་བསྐྱོད་བྱ་དགོས་ན། ལམ་སྒྲོན་མང་པོ་ཡོད་པའི་ནང་ནས་གཤམ་གྱི་ལམ་སྒྲོན་གསུམ་དེར་ངེས་པར་དུ་འབད་བརྩོན་བྱ་དགོས། ལམ་སྒྲོན་དང་པོ་ནི་དྲང་བདེན་ཡིན། ང་ཚོས་བྱ་བ་གང་ཞིག་སྒྲུབ་རུང་ཆུ་ཕོར་བ་གང་འཁྱེར་བ་བཞིན་དྲང་པོ་དགོས། མི་གཞན་གྱིས་སྒྲུབ་པའི་ལས་བཟང་དག རང་དང་རང་གི་མཐའ་འཁོར་ཚོས་མ་སྐུལ་དང་བླངས་ཀྱིས་བསྒྲུབ་དགོས། གཞན་གྱིས་མི་ལས་པའི་ལས་ངན་གྱི་གྲིབ་མ་དེ་དག ཁྱེད་དང་ཁྱེད་ཀྱི་མཐའ་འཁོར་ཚོའི་ཐོག་ཏུ་གཏན་ནས་སླེབས་མི་སྲིད། བྱ་བ་དྲང་པོར་སྒྲུབ་ན་གཞན་གྱིས་ཁྱེད་ལ་ཡིད་ཆེས་དང༌། རྒྱབ་སྐྱོར། བསམ་གཞིགས་བྱེད་ངེས་ལ། རང་ཉིད་ཀྱི་བྱ་བཞག་ཀྱང་བློ་བདེ་བག་ཕེབས་ངང་སྒྲུབ་ཆོག ལམ་སྒྲོན་གཉིས་པ་ནི་ངོ་ཚ་ཡིན། ང་ཚོས་ནམ་ཡང་གཞན་དང་གཞུང་གི་རྒྱུ་ནོར་ཧམ་ཟ་བྱེད་མི་རུང༌། རང་ཉིད་ཀྱིས་མི་གཞན་གྱི་ཅ་དངོས་ཅི་ཞིག་ཡིན་ཡང་དེ་ལ་འདོད་སེམས་བཅངས་མི་རུང༌། མི་ཞིག་ཡིན་ཕྱིན་ངོ་ཚ་ངེས་པར་དུ་དགོས། རང་ཉིད་ཀྱིས་བྱ་བ་ལོག་པ་དང་ནོར་འཁྲུལ་བྱས་ཚེ་དེ་ལ་ངོ་གནོང་སྐྱེ་དགོས། དེ་གང་འདྲ་བྱས་ནས་བསྒྱུར་བཅོས་གཏོང་མིན་བསམ་ཕོད་པ་དགོས། སྔ་མོའི་གཏམ་དཔེར། དྲང་བདེན་ནི་མིང་གྲགས་དང༌། ངོ་ཚ་ནི་བརྗིད་ཉམས་ཡིན་ཞེས་པ་ལྟར། རང་ཉིད་ལ་ཐོབ་པ་དང་མི་ཐོབ་པ་གཉིས་དབྱེ་བ་གསལ་པོ་འབྱེད་ཐུབ་པ་དང༌། རང་སྐྱོན་ངོས་ལེན་བྱེད་ཐུབ་པ་ཞིག་ཡོད་ན་གཞན་གྱིས་ཁྱེད་ལ་བློ་གཏོད་སྲིད་ལ། ཁྱེད་ཀྱི་བརྗིད་ཉམས་ཀྱང་ཡར་ངོ་ཟླ་བཞིན་འཕེལ་སྲིད། ལམ་སྒྲོན་གསུམ་པ་ནི་བྱམས་བརྩེ་ཡིན། གཞན་གྱི་གནས་བབ་ལ་ཐུགས་འཁུར་དང་བསམ་གཞིག་ཐུབ་པ་དགོས། འཇིག་རྟེན་འདིའི་སྟེང་གི་མི་སུ་ཞིག་ཡིན་རུང༌། སྤྱི་ཚོགས་འདིའི་འོད་ཟེར་ལོ་ངོ་བཅུ་ཕྲག་འགར་གཡར་བ་ཙམ་ཡིན། སྤྱིར་བཏང་མི་ཚང་མས་སྐྱེ་འཆི་ནི་མི་རྟག་པ་ཞིག་ཡིན་པ་ཤེས་ཡོད། དེ་བཞིན། རྒྱུ་ནོར་དང༌། གོ་ས། མིང་གྲགས་སོགས་ཀྱང་མི་རྟག་པའི་རང་བཞིན་དུ་གྱུར་ཡོད། སྤྱི་ཚོགས་འདིར་དངོས་ཡོད་ཀྱི་དོན་སྙིང་ལྡན་པ་ནི་སེམས་བསམ་པའི་བྱམས་བརྩེ་དེ་ཡིན། དངོས་ཡོད་ཀྱི་བདེ་སྐྱིད་ནི་བྱམས་བརྩེ་ཡིས་སྐྲུན་བཞིན་ཡོད། དེར་བརྟེན། ང་ཚོས་ཀྱང་བྱམས་བརྩེ་དེ་ལག་ལེན་དུ་བསྟར་ཐུབ་ན་གཡར་ཡོང་བའི་ལུས་པོ་འདི་ཡང་སྟོང་ཟད་དུ་མི་འགྲོ་བས་མི་ཚད། འོད་ཟེར་སྟོང་ལྡན་གྱིས་ཁེངས་པར་འགྱུར་སྲིད་པས། མི་རྣམས་ཀྱིས་བྱམས་བརྩེ་ལ་འབད་རོགས། བྱམས་བརྩེ་ནི་མི་བུ་ཞིག་གི་སྒྲུབ་བྱ་གཙོ་བོ་ཡིན། མི་ལ་ལས་མི་ཚེའི་ནང་ལམ་སྒྲོན་གསུམ་པོ་དེ་དགོས་པ་མི་ཤེས་སྟབས། མི་གཞི་དོར་ནས་རྒྱུ་ལ་རྔམ་པ་དང༌། ངོ་ཚ་སྐྱུར་ཏེ་གོ་སར་སྙེག་པ། ལ་རྒྱ་དོར་ནས་མིང་གྲགས་བསྐྲུན་པ་སོགས་ཀྱི་ལས་འདྲ་མིན་བྱེད་ཀྱི་ཡོད་པ་རེད། ཅིག་བྱས་ན་མི་དེ་ཚོས་ལམ་སྒྲོན་དེ་དག་གིས་རང་ཉིད་ཀྱི་མི་ཚེའི་ལམ་བུར་འོད་ཟེར་འཕྲོ་གི་ཡོད་པ་མི་ཤེས་པ་མིན་པར་ཁོང་ཚོའི་སེམས་ཁམས་ལ་འོད་ཟེར་འཚམ་གྱི་མེད་པ་དང༌། མི་གཞན་གྱི་མིག་ཟུང་རིག་མི་ཉན་པ་ཡིན་པས། མཐའ་མར་ཁོང་ཚོའི་འཚོ་བའི་ནང་སྐྱོ་གར་གྱི་ལེའུ་རྫོགས་རྒྱུ་མེད། མི་དེ་ཚོའི་ལོ་རྒྱུས་ཀྱང་དྲི་ངན་བྲོ་བའི་གད་སྙིགས་ཕུང་པོ་ཞིག་དང་འདྲ་བོ་རེད། ཁྱད་ཆོས་དེ་དག་གིས་རྒྱལ་ཕམ་ཐག་གཅོད་ཀྱིན་ཡོད། དེ་བས་སོ་སོའི་མི་ཚེར་ལམ་སྒྲོན་གསུམ་པོ་དེ་སྒྲོན་རྒྱུ་གལ་ཆེན་པོ་རེད། དོན་དངོས་ཐོག་དེ་དག་ནི་རང་ཉིད་ལ་འབྲས་བུ་གཡུར་དུ་ཟ་བ་ཞིག་ཐོབ་རྒྱུའི་ལམ་བུ་དེ་ཡིན།
Subscribe to:
Posts (Atom)