མ་ཡུམ་རྩོམ་སྒྲིག་པ།

སློབ་སྟོན་པ། རྒྱལ་རོང་ཐུབ་བསྟན་ཆོས་སྒྲོན།
སྤྱི་ཁྱབ་རྩོམ་སྒྲིག་པ། མེ་འོད།
ལག་བསྟར་རྩོམ་སྒྲིག་པ། ཉི་མ་འཚོ། ཚེ་རིང་ཆོས་སྒྲོན།
རྩོམ་སྒྲིག་པ། འབྲོང་དར་རྒྱས། བྱ་སྨྱོན་པ།
འབྲེལ་མཐུད་པ། རྒྱལ་རོང་པདྨ།

དྲ་ངོས་ཀློག་གྲངས།

About Me

མ་ཡུམ།
མ་ཡུམ་ཞེས་པའི་དྲ་རྒྱ་འདི་ནི་བུད་མེད་རྐྱང་བའི་རྩོམ་པ་པོ་རྣམས་ཀྱི་ཆེད་དུ་ཡིན་པ་དང༌། གཙོ་བོ་བུད་མེད་རྣམས་ཀྱི་བསམ་བློ་བརྗེ་རེས་བྱེད་སའི་སྟེགས་བུ་ཞིག་དང༌། བུད་མེད་རྣམས་ཀྱི་འདས་པའི་བྱུང་བ་དང་ད་ལྟའི་གནས་བབ། མ་འོངས་པའི་ཕུགས་བསམ་བཅས་གསལ་སྟོན་བྱེད་སའི་རང་དབང་གི་སྟེགས་བུ་ཞིག་ཀྱང་ཡིན། དྲ་རྒྱ་འདི་བུད་མེད་རྒན་གཞོན་དང༌། བཙུན་མ། སློབ་ཕྲུག་ཡོངས་ལ་གཏན་དུ་དབང༌།
View my complete profile

དྲ་རྒྱ་བཟོ་བཀོད་པ་བསོད་ནམས་འོད་ཟེར།

འབྲེལ་གཏུགས་ཁ་བྱང་།

mayum2010@gmail.com

Blog Archive

ཟིན་བྲིས་འདིའི་བདག་དབང་ཆ་ཚང་མ་ཡུམ་དྲ་རྒྱ་ལ་ཡོད།. Powered by Blogger.

དཀར་ཆག


༥/༨ ཨ་མའི་དུས་ཆེན་ལ།

བོད་ཀྱི་མ་ཡུམ་ཚོ་གཙོས་པའི་གནམ་འོག་གི་ཨ་མ་ཚང་མར་འཚམས་འདྲི་ཞུ་བ་དང་། ཨ་མ་ཚོའི་མཐའ་མེད་པའི་བྱམས་སེམས་དང་གཏིང་ཟབ་པའི་བརྩེ་བ་ཡིས་འགྲོ་བ་མིའི་རིགས་ཀྱི་རང་བྱུང་ཁམས་ལ་བདེ་སྐྱིད་རྫོགས་ལྡན་ཐོབ་པར་སྨོན་འདུན་ཞུ།

མེ་སོར་རྒྱལ་བོའི་ཕོ་བྲང་དུ་བསྐྱོད་པ།
                                                    གཟུངས་ཕྱུག་སྐྱིད
ལོ་རྒྱུས་ཤིག་གི་སྔ་ནུབ་ནས་ཀྲོང་ངེར་འགྲེང་བའི་ཁྱེད
འདི་ལྟར་བདག་གི་མཐོང་སྣང་ནས་ཁུ་སིམ་མེར་གནས་དོན་ཅི
སྣུམ་ཤིག་ཤིག་གི་ཚོམས་ཆེན་ཁང་རེ་རེ་དལ་གྱིས་མཇལ་དུས
གནའ་བོའི་དྲག་དམག་གི་རྔམ་བརྗིད་དང་དཔའ་མཛངས་རེ་རེ་ཐོལ་གྱིས་མངོན་བྱུང

ས་ཆེན་འདིའི་སྟེང་ནས་སུ་ཞིག་དབང་དུ་བསྒྱུར་པའི་མི་ཕོ་ཞིག་གི
རིང་བོར་བསྲིངས་པའི་ཚེ་སྲོག་གི་སྙིང་སྟོབས་གསོན་པོ
དུས་དེ་རིང་ཡང
ཡུལ་གྲུ་འདིའི་ནམ་མཁའ་ན་མཐོ་རུ་བསྒྲེངས་འདུག

གནའ་བོའི་བ་སོ་དང་མུ་ཏིག་གིས་བརྒྱན་པའི་བཞུགས་ཁྲི་རེ་རེ་ལས
མི་ཡུལ་འདིའི་རེ་སྒུག་དང་དྲན་གདུང་མང་པོ་ལྷོད་ཀྱིས་འཁྱིལ་ཞིང
མཚར་སྡུག་འཛུམ་ཆུང་གིས་ཁུར་བའི་བཙུན་མོའི་ཚོགས་ཀྱི
སིལ་སིལ་གྲོལ་བའི་རྐང་གདུབ་ཀྱི་དབྱངས་རྟ་དང་དྲི་བསུང་ད་དུང་བཞུར་བཞིན་འདུག
ཕྱི་རོལ་གྱི་ཐང་ཆེན་ནི་ཆེད་དུ་བརྐྱངས་པའི་དབུགས་ལྡན་ཞིག་གི་བྲང་གཞུང་ལྟར
ཚ་ལམ་ལམ་ལྡིང་བའི་སྙིང་རྩའི་དཀྱིལ་དབུས་སུ
རྟ་དམག་ཁྲི་ཕྲག་གི་མདུང་སོ་དང་རལ་གྲིའི་རྩེ་མོ་འོད་ཆེམ་ཆེམ་དུ་མཆེད་ཀྱིན་འདུག

བཤད་རྒྱུན་ལ  ཆེས་སྔ་བའི་མཐའ་སྲུང་གི་དམག་འཁྲུག་ཅིག་འདི་ནས་མཇུག་རྫོགས་མྱོང་ཟེར་ལ
ཆེས་རིང་བའི་ལོ་རྒྱུས་རྒྱལ་ཕམ་གྱི་འཐབ་རྩོད་ཅིག་འདི་ནས་འགོ་བརྩམས་མྱོང་ཟེར
བདེན་ནམ  ཁྱེད་རང་འདི་ལྟར་རང་ཉིད་ཀྱི་སྟོབས་ཤུགས་དང་ལྷན་དུ་བཞུད་སོང་བ
ཁྱེད་རང་འདི་ལྟར  རང་ཉིད་ཀྱི་མངའ་ཐང་དང་ལྷན་དུ་བཞུགས་འདུག་པ
དུས་ཀྱི་རྒྱང་བཞུད་པ
དུས་རླུང་གིས་གཞོམ་གཞིག་བྲལ་བའི་ངོ་གདོང་འདི་ཁྱེད་རང་ཡིན་ན
དེ་རིང་ཁྱེད་ཀྱི་པང་བར་འབྱོར་བའི་ཡུལ་འཁྱར་བ་རྐང་རྗེན་དེ་ང་རང་མིན་ནམ
བདག་གིས  འདི་ལྟར་རང་ཉིད་ཀྱི་ཆག་འཇིག་ཁྲོད་ཁྱེད་ཉིད་བཙལ་དགོས་བྱུང

ང་ཡི་གནས་ཚང་ལགས
ངས་ཀྱང་བོར་ཟིན་པའི་མངའ་ཐང་ཞིག་བསྐྱར་དུ་བཙལ་གྱིན་ཡོད་ལ
རྙེད་འོས་པའི་རྨི་ལམ་ཞིག་འགོ་ནས་འཚོལ་གྱིན་ཡོད
བཞུད་སྔ་བའི་ཁྱེད་རང དེ་རིང་འདི་ལྟར་ཁུ་སིམ་མེར་གནས་ཀྱང
ཆགས་འཇིག་དང་རྒྱལ་ཕམ་གྱིས་བསྒུལ་བའི་མི་ཡུལ་འདིའི་མིག་ཟུང་ན
ཁྱེད་ཉིད་སྔར་བཞིན་ཚེ་སྲོག་གིས་བསླངས་པའི་ཆེས་སྙིང་དུ་སྡུག་པའི་ལོ་རྒྱུས་ཤིག
              ༠༡༠ལོའི་ཟླ་༩པའི་ཚེས་༦ཉིན་སེམས་སུ་སྦྲུམ་ཞིང་ཚེས་༡༡ཉིན་ཡི་གེར་ཕབ།



ལས་སྐལ་ནག་པོ།
 ལྟོ་གོས།

    ཁྲི་སྲས་འོད་དཀར། ཤེས་རབ་དགའ་ཚལ་སློབ་གླིང༌།

ཁུ་སིམ་སིམ་གྱི་མཚན་མོ་ཞིག་ལ།
གནས་འདི་རུ་ངུ་འབོད་བྱེད་ཅིང༌།
ངའི་ཕ་ལོ་མ་ལོ་ཚོ་སྐྲག་དངངས་ཀྱིས་རྒྱུག་འདུར་ལ་བྲེལ།
འདི་ལྟར། ཡ་ང་བའི་སྐྱོ་གར་ལ་གདུང་འབོད་བྱེད་ཆེད།
ད་ཅི་བྱ།  འདི་ནི་ང་ཚོ་བརྒྱུད་དགོས་པའི་ལམ་ཁ་ཞིག་ཡིན་ནམ།
ཡང་ན།         ང་ཚོའི་ཁ་རྒྱུན་ལྟར་ལས་རྒྱུ་འབྲས་ཡོད་ཟེར་བ་བཞིན།
ང་ཚོས་ཁོ་ཚོ་ལ་སྐྱེས་བ་སྔོན་མར་ཁྲག་ལན་ནམ་ཤ་འཁོན་ཆད་ཡོད་པ་ཨེ་རེད།
ངས་བསམ་ན། དེ་ནི་གཏན་ནས་མ་རེད།
དེ་ནི་གང་ཞིག་གི་ལོ་རྒྱུས་ནང་ཚིག་འབྲུ་རེ་རེ་གསལ་ཞིང༌།
ད་དུང༌། ཁོ་ཚོའི་ལག་ནས་བུ་ལོན་ཆད་མྱོང་མེད་པས་ཀྱང༌།
ང་ཚོའི་སྐྱེས་ཆེན་དམ་པ་གང་ཞིག་གིས།
ཁོ་ཚོའི་བུ་རབས་ཚ་རྒྱུད་རྣམས་སྐྱབས་ཤིང༌།
ཁོ་ཚོའི་མི་རིགས་འདི་ད་ལྟ་འཚོ་བཞིན་པའང་ང་ཚོའི་ཡབ་མེས་ཤིག་གི་སྐུ་དྲིན་མ་ཡིན་ནམ།
ད་ལྟ།  ཅི་ལྟར་བཤད་ཀྱང༌།
ཁོ་ཚོ་ལ་རྩལ་དྲུག་གི་གཉོམ་ལག་རྒྱས་ཤིང༌།
ས་ཆེན་འདིའི་མཐོ་ས་ན་འགྱིངས།
ཁོ་ཚོ་ལ་སྙིང་རྗེ་ཡི་སེམས་རྒྱུད་མེད་ཅིང༌།
སྲོག་གཅོད་ཀྱི་རལ་གྲི་གང་སར་གཡུགས་ཏེ་དེ་རུ་གཏུབ།
ཁོ་ཚོ་ལ་དྲང་བདེན་གྱི་གནས་ལུགས་འཆད་ཀྱང༌།
རྒྱབ་འགལ་གྱི་ལུང་ཚིག་སྐམ་པོ་ལས་ཅི་ཡང་རེག་མ་བྱུང༌།
ཟླ་བ་མེད་པའི་མཚན་མོ་ཞིག་ལ།
གནས་འདི་རུ་ཁྲག་དམར་གྱི་རྒྱ་མཚོ་འཁྱིལ་ཞིང༌།
ངུ་ངག་གི་སྐྱོ་གདུང་ཟབ་མོས་མཁའ་དབྱིངས་ཁད་ཀྱིས་དཀྲོགས།
ངའི་ཕ་ལོ་མ་ལོ་ཚོ་ད་དུང་གོག་མ་བགྲོད།
ད་བྱ་ཐབས་ཅི།
ཡོད་ཚད་ཀྱི་ཡོད་ཚད་འདི་ལྟར་ཤོར་ཡང༌།
ཁོ་ཚོའི་སྙིང་དབུས་ན་རྒྱུ་བའི་ཟུངས་ཁྲག་དྲོན་མོ་དེ།
ད་དུང་དྲོད་ལམ་ལམ་གྱི་ངང་ནས།
ང་ཚོ་སྟེ། བུ་རབས་ཚ་རྒྱུད་ལ་བཞག་པའི་སེམས་ཤུགས་དྲོན་མོ་དེ་ཡིན།
དེར་བརྟེན།   ང་ཚོས་འདི་ལྟར་རྒྱང་བཞུད་ཀྱི་ལམ་བུ་འདི་བསྙེགས་ཏེ།
སེམས་ཁོང་དུ་སྦས་པའི་བློ་རིག་གསར་འབྱེད་ཀྱི་ལྡེ་མྀག་ཅིག་བཙལ་དུ་ཡོང་རུང༌།
གནས་འདི་རུ་ཅི་ལྟར་བཙལ་ཡང་ཅི་ཡང་མ་རྙེད།
ཐ་ན་རང་ཉིད་ཀྱི་ཐོབ་སྐལ་ཙམ་ཡང་རྙེད་མ་བྱུང༌།
ད་ཅི་བྱ།        རེ་འདུན་གྱི་ཕུགས་བསམ་ཇི་ལྟར་བཙལ་རུང༌།
ཡོད་ཚད།  འདི་ལྟར་ཐོབ་ཤོར་གྱི་གནས་མལ་བརྒལ་གྱིན།
སྔར་བཞིན་ཕྲག་དོག་གི་ལམ་བུ་བརྒྱུད།



ང་དང་མ་ཡུམ།
                             ཨ་གཡུ་ཆུང༌། ཝར་ཎ། 
མ་ཡུམ  ལོ་རྒྱུས་ཀྱི་གདོང་རིས་ངོས་སུ
ཁ་ཆར་བུ་ཡུག་གི་བཙན་ཁ་རྣོན་པོ་དེ
རྨི་ལམ་དང་མངོན་སུམ་གྱི་བར་གླེགས་ནས
ང་ཚོས  གོམ་སྟབས་རེ་རེ་དང་མིག་ཆུ་རེ་རེ
བརྩེ་སེམས་དང་ལྷག་བསམ་སྣུམ་པོས་སྐུང་པའི
ཞི་གཤིས་དེས་རིང་ནས་གཞལ་མྱོང

མ་ཡུམ  སྤྱི་ཚོགས་ཀྱི་རང་གཤིས་བར་ནས
གོད་ཆག་དང་ཉེས་དམོད་འཁྱིལ་བའི་གཏམ་རྒྱུད་གང་མང་ཞིག
གནས་ཚུལ་དང་སྣང་ཚུལ་གྱི་གྲུ་ཟུར་རེ་རེ་ན
ང་ཚོས  ཕྱིར་དྲན་དང་བསམ་གཞིགས་ཁྲོད་ནས
བརྒལ་མ་ཤེས་པའི་གཏམ་རྒྱུད་གང་མང་ཡོད་ལ
བརྒལ་མ་ཐུབ་པའི་གཏམ་རྒྱུད་ཀྱང་གང་མང་ཡོད

མ་ཡུམ   དུས་རབས་ཀྱི་འཁོར་བསྐྱོད་འདི་ལས
ཤར་ནུབ་ཀྱི་རླུང་བུ་འཁྲིགས་མའི་ཟློས་གར་བསམ་ན
གནའ་སྲོལ་དང་དེང་རབས་ཀྱི་རིན་ཐང་ངོས་ནས
ང་ཚོས   འཇལ་ཤིང་གི་རིག་པས་སྐྱ་ག་ཚད་འཐབ་ཀྱང
བདེན་དོན་དང་བྱམས་བརྩེའི་སྲོག་ཤིང་དེ
ཡུམ་ཆེན་ཚོའི་ལྷག་བསམ་དང་དྲོད་ཁོལ་ལ་ཁ་བྲལ་མ་མྱོང                                     
ཕྱི་ལོ་ ༢༠༡༠ ཟླ་ ༦ ཚེས་ ༡༤ ཉིན་བྲིས།

 

བརྙན་རིས།
                  པདྨ་མཚོ་སྐྱིད།
                  
དེ་རིང   ཁ་སང་གི་གཏམ་རྒྱུད་གླེང
བཙན་པོ་ཚོའི་མངའ་ཐང་བཤད
བློན་པོ་དག་གི་བྱས་རྗཻས་དང་གོད་ཆག
བཙུན་མོ་ལྔ་བརྒྱའི་ཕྲག་དོག་དང་འགྲན་སེམས
གླེང་བཞིན་གླེགས་བམ་དུ་བཀོད
འདི་ཚོ་དེ་རིང་གི་བགྲོ་གླེང་བྱེད་ས
ལོ་རྒྱུས་ཀྱི་ཁུངས་ལུང་གཏུགས་ས
མདོར་ན
དེ་རིང་གི་འུ་ཚོའི་ཕོ་ཚོད་རེད
               
དེ་རིང   ཡབ་མེས་ཀྱི་མཛད་རྗེས་གླེང
ཤུལ་བཞག་གི་རིན་ཐང་བཤད་བཞིན
བཤད་མཁན་དང་གླེང་མཁན་དེ་ཚོས
ཡ་ང་བའི་ཟློས་གར་འཁྲབ
ཟློས་གར་གྱི་སྟངས་སྟབས་རེ་རེར
རུལ་དྲི་ཐུལ་བས
དེ་རིང་གི་བརྙན་རིས་འདི་ཚོ
རུལ་དྲི་ཁ་བའི་ལེགས་སྐྱེས་ཤིག་གི་ཚུལ་གྱིས
སང་ཉིན་བསུ
               
ཆག་གྲུམ་ཤོར་བཞིན་པའི་དབྱངས་གསལ་སོ་བཞི
འཚོ་བཅུད་ཉམས་བཞིན་པའི་སྦྲང་དཀར་རྩམ་པ
ཁ་དོག་འགྱུར་བཞིན་པའི་བོད་མིའི་ཕྱི་ཤུན
ད་དུང
ད་དུང་རུས་རྐང་ལ་ལྷད་ཞུགས་པའི་མིའུ་ལྡོང་དྲུག་གི
བུ་རབས་ཚ་རྒྱུད་འདི་ཚོ
སང་ཉིན་གྱི་གཏམ་རྒྱུད་རལ་པོ་ཞིག་གི་བརྙན་རིས་ཨེ་ཡིན
                             ༢༠༡༠    ༡༠ ཉིན།



     ངའི་ཡུལ་ཤུལ་ཕུ་ནུ་མིང་སྲིང་ཚོ།
                             སྨིན་སྣང་མཛེས། སཱ་ར།
ཤ་དང་ཁྲག་གི་འཁོར་རྒྱུན་གཅིག་པ།
སྐད་དང་ཡི་གེའི་འཕེལ་ཕྱོགས་གཅིག་ལ།
སེམས་དང་སེམས་པའི་རྨུ་ཐག་གཅིག་པ།
ངའི་ཡུལ་ཤུལ་ཕུ་ནུ་མིང་སྲིང་ཚོ།
ཅིའི་ཕྱིར་གྱང་རོ་དང་གད་སྙིགས་སུ་འཐིམས་དགོས་བྱུང་སོང༌།
ཀྱེ་མ་་་་་་སྙིང་རྗེའི་ལྷ་མཆོག ཐུགས་རྗེས་གཟིགས་རོགས།
ཨོཾ་མ་ཎི་པདྨེ་ཧཱའུྃ
མདོ་དབུས་ཁམས་གསུམ་ས་ཕྱོགས་གཅིག་ལ།
ཡིག་དྲུག་དབྱངས་རྟ་གྱེར་ཕྱོགས་གཅིག་པ།
སྦྲང་དཀར་རྩམ་པར་རོལ་ཕྱོགས་གཅིག་ལ།
ཆོས་དང་སྲིད་ཀྱི་གླེང་ཕྱོགས་གཅིག་པ།
ངའི་ཡུལ་ཤུལ་ཕུ་ནུ་མིང་སྲིང་ཚོ།
ཅིའི་ཕྱིར་མིག་ཆུ་དང་འོ་དོད་ཀྱི་ཁྲོད་དུ་འདུག་དགོས་བྱུང་སོང༌།
ཀྱེ་མ་་་་གངས་རིའི་མགོན་པོ། ཐུགས་རྗེས་གཟིགས་རོགས།
ཨོཾ་མ་ཎི་པདྨེ་ཧཱའུྃ

སྦྲ་ནག་གྲུ་བཞིའི་གནས་ཁྱིམ་གཅིག་ལ།
རྟ་ནོར་ལུག་གི་འཚོ་རྟེན་གཅིག་པ།
གངས་ཅན་བོད་པའི་མིང་བྱང་གཅིག་ལ།
གཞིས་བྱེས་ལས་ཀྱི་མྱོང་ཕྱོགས་གཅིག་པ།
ངའི་ཡུལ་ཤུལ་ཕུ་ནུ་མིང་སྲིང་ཚོ།
ཅིའི་ཕྱིར་མི་ཡུལ་གྱི་དམྱལ་བ་དངོས་སུ་མྱོང་དགོས་བྱུང་སོང༌།
ཀྱེ་མ་་་་་་་་་་ང་དང་གཏན་བྲལ་གྱི་ཡུལ་ཤུལ་ཕུ་ནུ་མིང་སྲིང༌།
ཤུལ་ལུས་ཀྱི་ཕུ་ནུ་མིང་སྲིང༌།
ང་ཚོའི་བར་ཐག་ལེ་དབར་སྟོང་ཕྲག་གིས་ཆོད་ཀྱང༌།
སེམས་དང་སེམས་པའི་རྒྱུན་ཐག་ནམ་ཡང་གཅིག་ཏུ་སྦྲེལ་ཡོད།

 
        གཡུ་ཞུན། ཨ་རི།
འགྲོ་བ་མི་ཡི་བག་ཆགས་ཀྱི་འདོད་མོས་ཐོག་མ
ཐོག་མའི་ལྟོ་གོས་ལ་གྲལ་རིམ་དང་རིགས་རུས་མེད
མེད་པའི་སེམས་ནི་དུང་ཟླ་དཀར་པོ་བཞིན་གསལ
གསལ་བའི་འདོད་པ་མང་བས་ཚད་ཐིག་བརྒལ
བརྒལ་ཚད་ཐོབ་པས་རེ་བསྙེག་ཅིག་ཏུ་གྲུབ
གྲུབ་པའི་མཐའ་མར་རྔམ་སྲེད་ཆེ་རུ་ཕྱིན
ཕྱིན་ཅི་ལོག་པའི་བྱ་དངོས་འཕེལ་རིམ་ཇི་ལྟར་རྒོལ
རྒོལ་བའི་དངོས་ལ་འཁྱམས་པོའི་སེམས་སྲུང་ཉིད
            བུད་མེད།
མཛེས་སྡུག་ནི་བུད་མེད་ཁོ་ནར་དབང་བའི་ཁྱད་ནོར་ཞིག་ཡིན་ན
བྱམས་སེམས་ཀྱང་རླབས་ཆེན་གྱི་ཨ་མར་ཕུལ་བའི་གཟི་བྱིན་དུ་འབུས
སྙིང་རྗེའང་འཇིག་རྟེན་གྱི་ཨ་མ་ཚོའི་མིག་ཀོང་ན་འཕྱོ་བའི་དྲོད་ཁོལ་ཞིག
བྱམས་སྐྱོང་གི་ལག་ཟུང་བསྲིངས་ནས་སུ་ལ་སྨྲེ་ངག་གཏོར
མི་ཚེ་སྡུག་ཡས་དང་འཁང་རའི་ཁྲོད་འདའ་བ་ལས
རྒྱང་རིང་གི་གནམ་ས་ན་རྒྱུ་བའི་སྤྲིན་ཚོགས་ལ་གཟིགས་དང
འུ་ཅག་གི་བློ་གྲོས་དང་སེམས་དཀྱེལ་དེ་བཞིན་དུ
མི་ཚེ་གཉོར་སྐྱོང་དང་ཟས་གཡོའི་ཁྲོད་ཟད་པ་བདེན་དུ་ཆུག་ཀྱང
བུད་མེད་ཚོ་མེད་ན་འཇིག་རྟེན་ལ་དྲོད་ཁོལ་བྲལ་ཞིང་མི་ཚེར་ཁ་དོག་དབེན
ཡིད་དུ་འོང་བའི་བུད་མེད་ཚོ
བུ་ཕྲུག་ནི་སྐྱ་ཡའི་བྱས་ཉེས་ཀྱི་དན་རྟགས་མ་ཡིན་པར
བརྩེ་མགུའི་འོད་མདངས་ཁྲོད་སྨིན་པའི་འབྲས་བུ་ལཊ་ན
ལེ་ཁག་དང་སྡིགས་དམོད་ཡོད་ཚད་ཁྱོ་ག་ཁོ་ནར་ཁག་དཀྲི་ཅི
སྐྱེས་པའི་བཟོད་སྒོམ་ལ་ཚད་གཞི་མེད་ཀྱང་ལས་འབྲས་རྒྱ་མས་ཚད་འཇལ་ལོས་སྲིད
བུད་མེད་ནི་འཇིག་རྟེན་གྱི་སྐྱེད་ཡུམ་ལས་གཤེད་མ་ག་ལ་ཡིན
རང་གཅེས་དང་དམ་ཚིག་ལེགས་པོར་བསྲུང་བ་ལས
ཅོལ་ཆུང་གི་ཧམ་གཏམ་ཁོ་ནའི་རྒྱལ་མ་ཡིན

མ་ཡུམ་དྲ་ཚིགས་ཀྱི་འཁྲུངས་སྐར་ལ་ཕུལ་བ། ཀླུ་སྨྱོན་ཧེ་རུ་ཀ

རང་བྱུང་ཁམས་ཆེན་པོ་ལྟ་བུའི་མ་ཡུམ་ཚོའི། ནམ་མཁའ་ལྟ་བུའི་བྱམས་བརྩེ་དང་། ས་གཞི་ལྟ་བུའི་ཕྱག་ཟུང་། རྒྱ་མཚོ་ལྟ་བུའི་སྤྱན་ཆབ་ཀྱིས་ཆེ་རུ་གསོས་པའི་ང་ཚོས། རང་གི་མ་ཡུམ་དག་ལ་དྲིན་ལན་ཅི་ཞིག་འཇལ་ཡོད། རང་གི་མ་ཡུམ་དག་གི་དྲིན་ལན་ཇི་ལྟར་འཇལ་རྩིས་ཡོད། ཀྱེ། བདག་གི་སྙིང་ཉེ་བའི་གྲོགས་པོ་དག

མ་ཡུམ་དྲ་བའི་དབུ་འབྱེད་ལ་བཅོས་མིན་སྙིང་ནས་རྟེན་འབྲེལ་ཞུ། ལྷ་ཆབ་སྦྱིན་པས།

རང་རེའི་བཙན་བྱོལ་སྤྱི་ཚོགས་འདི་འཁྲུག་ཆ་དོད་དུ་ཕྱིན་པ་དང་མཉམ་དུ་གཞུང་སྒེར་སྣ་ཚོགས་ཀྱི་རྩོམ་རིག་གི་དྲ་བ་སོགས་ཀྱང་དེ་བཞིན་དུ་ཆར་རྗེས་ཀྱི་ཤ་མོ་བཞིན་བརྡོལ་འོང་གི་འདུག འདས་པའི་ལོ་གཅིག་གི་ནང་ཚུན་ལ་ཡང་རྣམ་པ་མི་འདྲ་བའི་དྲ་བ་ཁག་དུ་མ་ཞིག་བྱུང་བའི་ཁྲོད་ཐད་ཀར་སྤྱི་ཚོགས་ལ་ཤུགས་རྐྱེན་ཡོད་པ་ཞིག་ཅི་བས་དཀོན་ནའང་། དེ་རིང་རྒྱལ་སྤྱིའི་སྐད་ཡིག་གི་ཉིན་མོར་སྟབས་བསྟུན་ནས་༼མ་ཡུམ༽ཞེས་པའི་དྲ་བ་འདི་བོད་རིགས་བུད་མེད་རྣམས་ལ་ཆེད་དུ་དམིགས་ནས་དབུ་འབྱེད་བྱས་པར་བཅོས་མིན་སྙིང་ནས་རྟེན་འབྲེལ་ཞུ་བ་དང་ཆབས་ཅིག་ཏུ། མ་འོངས་པར་འདི་དང་འདི་བརྒྱུད་ནས་བོད་རིགས་བུད་མེད་རྣམས་ཀྱིས་འདས་པའི་མེས་པོའི་སྲོལ་རྒྱུན་ལས་རང་གི་རིགས་ལ་དམའ་འབེབ་དང་མཐོང་ཆུང་ཅི་བྱས་ཀྱི་ཉམས་མྱོང་ལ་བརྟེན་ནས། གསར་གཏོད་དང་སྒྱུ་རྩལ། དམིགས་འབེན་ཡོད་པ་ཞིག་གི་ལམ་ཁ་སྙེག་ཐུབ་པའི་བཀྲ་ཤིས་བདེ་ལེགས་ཞུ།

མ༵་ཡུམ༵་དྲ་རྒྱ་ལ་ཕུལ་བའི་ཤིས་ཚིག་དང་འབོད་སྐུལ། དགེ་བཤེས་བེ་རི་འཇིགས་མེད།

མ༵་ཡུམ༵་གངས་ཅན་གྱི་ཞིང་ཁམས།། མ༵་རབས་རྒྱ་དམར་གྱིས་འཕྲོགས་ཀྱང་།། མ༵་འཁྱོགས་དྲང་ཐིག་གི་རི་མོ།། མ༵་ཆད་དྲ་ཐོག་ནས་གསལ་འོང་།། མ༵་ལོའི་འོ་མ༵་ཡིས་གསོས་པའི།། མ༵་སྤུན་བོད་རིགས་ཀྱི་མི་དམངས།། མ༵་བཅོས་སེམས་ཁམས་ཀྱི་རི་མོ།། མ༵་སྦས་དྲ་ཐོག་ལ་ཁོད་དང་།།

རྒན་བསོད་ནམས་རྒྱལ་མཚན་གྱིས་མ་ཡུམ་དྲ་ཚིགས་ལ་གནང་བའི་ཤིས་ཚིག

རྟེན་འབྲེལ་ཞུ། སེམས་ཁུང་གི་ཀུན་རྟོགས་ཀྱི་འདབ་མ་རེ་རེ། མཁའ་དབྱིངས་སུ་རྩེན་པའི་ཆུ་འཛིན་གཞོན་ནུ་དང་བསྡེབས་ནས། མཐའ་ཡས་པའི་བློ་གསར་པ་མང་པོ་ཞིག་གི་འདབ་མ་གྲོལ་བའི་སྨོན་འདུན་ཞུ།

ཨ་འཇམ་གྱིས་མ་ཡུམ་དྲ་བར་གནང་བའི་ཤིས་ཚིག

མ་ཡུམ་ནི་མིའི་རིགས་ཀྱི་གཙང་བོའི་འགོ་ཁུངས་ཤིག མ་ཡུམ་ནི་བྱམས་བརྩེའི་རྨང་གཞི་འདིང་མཁན་གྱི་ཞི་བདེའི་ནམ་མཁའ་ཞིག མ་ཡུམ་ནི་འཚོ་བའི་བར་སྣང་ཕྱེ་བའི་སྐྱ་རེངས་ཀྱི་སྒོ་གླགས་ཤིག འདི་ལྟར་མ་ཡུམ་ནི་འཚོ་གནས་ཀྱི་ཁོར་ཡུག་ནས་མེད་དུ་མི་རུང་བའི་མ་ཡུམ་ཞིག་སྟེ། འདི་ལྟར་མ་ཡུམ་གྱི་དྲ་རྒྱ་དབུ་བརྙེས་པ་ཡང་སྤྲོ་སེམས་ཁོལ་བའི་ངང་རྟེན་འབྲེལ་ཞུ། ༢༠༡༡ ༢ ༢༣ ལ་གོང་ས་ཏཱ་ལའི་བླ་མ་མཐོ་སློབ་ནས་ཨ་འཇམ་གྱིས།

མ་ཡུམ་དྲ་ཚིགས་ཀྱི་སྐྱེས་སྐར་ལ་ཕུལ་བའི་ཤིས་ཚིག གཟུངས་ཕྱུག་སྐྱིད།

རྒྱལ་ཡུམ་རྗེ་བཙུན་སྒྲོལ་མ་དག་སྣང་གིས་བཞེངས་ནས།། ཡུམ་ཆེན་བྲག་གི་སྲིན་མོའི་རྣམ་ཐར་ནས་བརྩམས་ཏེ།། མ་གཅིག་ལབ་ཀྱི་སྒྲོན་མའི་མཛད་རིམ་ལ་གཞིགས་ཚེ།། སྐྱེད་ཡུམ་ལྷ་མོའི་ཚོགས་ཀྱི་རྟོགས་བརྗོད་དེ་མཚར་ཨང་།། འབྲོ་བཟའ་ཁྲི་མ་ལོད་ཀྱི་དཔའ་མཛངས་དེ་བཙལ་ནས།། བཙན་མོ་སད་མ་ཀར་གྱི་བློ་བཀོད་ལ་བསྔགས་བཞིན།། ཚེ་སྤོང་མེ་ཏོག་བཟའ་ཡི་མཁྲེགས་འཛིན་ལ་བསམ་ན།། ན་རིམ་བཙུན་མོའི་ཚོགས་ཀྱི་ལོ་རྒྱུས་དེ་བརྗིད་ཨང་།། མྱང་ཚ་དཀར་རྒྱན་ཁྲོས་པའི་བློ་སྤོབས་ལ་དཔྱད་ཀྱིན།། ཨ་ཅེ་སྣང་ས་སྐྱོ་བའི་ངེས་འབྱུང་ལ་བརྟག་ནས།། གླིང་བཟའ་སེང་ལྕམ་འབྲུག་མོའི་སྐྱེས་འབྲས་ལ་བལྟས་ན།། གངས་ཅན་མ་ཡུམ་དག་གི་བཞུད་ལམ་འདི་རྨད་ཨང་།། བྱམས་བརྩེའི་དྲིན་གྱིས་བསྐྱངས་པའི་མ་རྒན་ནས་བརྩིས་ཏེ།། དགའ་བའི་འཛུམ་གྱིས་བསུ་མཁས་སྨན་ཤར་གྱི་གྲོགས་མོ།། འཇིག་རྟེན་བདེ་ལྡན་ཞིང་གི་ཁྱིམ་གཞིས་ལ་དཔག་ཚེ།། བདེ་སྦྱིན་མ་ཡུམ་ཚོགས་ཀྱི་དུངས་པ་དེ་འཕགས་ཨང་།། ད་ཡང་འཇིག་རྟེན་མི་ཡི་གྲལ་འགོ་ནས་ལངས་ཏེ།། ཤར་ནུབ་འཛམ་གླིང་ཟླུམ་པོའི་དཀྱིལ་དབུས་སུ་ཕེབས་ནས།། ༼མ་ཡུམ་དྲ་ཚིགས༽སྒེག་མོ་ལྷུག་ལྷུག་ཏུ་དགད་ཚེ།། ཕྱོགས་ཀྱི་མགྲོན་པོའི་ངག་གི་རམ་འདེགས་འདི་མཛེས་ཨང་།། ཞེས་པ་འདི་གསར་དུ་སྒོ་འབྱེད་གནང་བའི་མ་ཡུམ་དྲ་ཚིགས་ཀྱི་སྐྱེས་སྐར་ལ་བཀྲ་ཤིས་ཁ་བཏགས་ཤིག་གི་ཚུལ་དུ་གཟུངས་ཕྱུག་སྐྱིད་ཀྱིས་སྤྱི་ལོ་༢༠༡༡ལོའི་ཟླ་༢པའི་ཚེས་༢༡ཉིན་རྡ་རམ་ས་ལར་བྲིས།

མ་ཡུམ་དྲ་ཚིགས་ལ་ཕུལ་བའི་ཤིས་ཚིག་བཀྲ་ཤིས་འཁོར་ལོ་མ། ཐོར་རྒོད་པ་སྤྱན་ཆབ།

  ཁྱོད་ཀྱིས་གསུངས་པའི་རྨི་ལམ་དྭངས་མོ་གཅིག། ང་ལ་ཡོད་པའི་དམིགས་ཀྱི་རི་མོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་ཚིག་གི་ལྷ་ཡིས་ངེད་གཉིས་སྲུངས།།  ཁྱོད་ཀྱིས་བསྙལ་བའི་ལོ་ཆང་བསིལ་མ་གཅིག། ང་ཡིས་འདོད་པའི་བཟི་ཁ་བཙན་པོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་བདུད་རྩི་མཆོད་པའི་ངེད་གཉིས་བསྟོད།།  ཁྱོད་ཀྱིས་བོར་པའི་ཞེ་མདང་མདུད་པ་གཅིག། ང་ལ་མངའ་བའི་མགུལ་ལེ་དྲོན་མོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་རྫས་ཀྱི་ཐག་པས་ངེད་གཉིས་ཆོངས།།  ཕྱི་ན་བཀྲ་ཤིས་འཛུམ་ཀྱི་མངར་ཁ་གཅིག། ནང་ན་བཀྲ་ཤིས་ཕན་པའི་དྲོད་ཁོལ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བོད་ཀྱི་མ་ཡུམ་དྲ་ཚིགས་ཁྲི་ལོར་ཤོག

ཐུགས་རྗེ་ཆེ་ཞུ།

ཁེ་ན་ཌ་གནས་བཞུགས་དྲ་རྒྱ་སྒྲིག་སྦྱོར་ཆེད་མཁས་པ་བསོད་ནམས་འོད་ཟེར་ལགས་ཀྱིས་ལྷག་བསམ་རྣམ་དག་གིས་ང་ཚོར་དྲ་བའི་མཐུན་རྐྱེན་དང་། དྲ་ཚིགས་སྒྲིག་སྦྱོར་ཐོག་ལམ་སྟོན་རོགས་རམ་གནང་བ་བཅས་ལ་སྙིང་ཁོངས་རུས་པའི་གཏིང་ནས་བཀའ་དྲིན་ཆེ་ཞུ། མ་ཡུམ་རྩོམ་སྒྲིག་པས།