དྲ་རྒྱ་བཟོ་བཀོད་པ་བསོད་ནམས་འོད་ཟེར།
༧གོང་ས་མཆོག་གི་བཀའ་སློབ།
སྤྱི་ཡོངས་ཀྱི་ཆ་ནས་བཤད་ན། ཕོ་དང་མོ་གཉིས་ལས་ཞི་བདེ་དང་འཚེ་བ་མེད་པ། བྱམས་སྙིང་རྗེ་སོགས་བུད་མེད་ཚོར་ཅུང་ཤུགས་ཆེ་བ་མེད་དམ་སྙམ། གང་ཡིན་ཟེར་ན། འཛམ་གླིང་ནང་བྱུང་དང་འབྱུང་བཞིན་པའི་རྙོག་དྲ་དང༌། དྲག་སྤྱོད། འཚེ་བའི་ལས་རིགས་བྱེད་མཁན་མང་ཆེ་ཤོས་སྐྱེས་པ་ཚོ་ཡིན་ཞིང༌། འདས་པའི་དུས་རབས་ནང་འཛམ་གླིང་ནང་མི་གྲངས་ས་ཡ་ཉི་ཤུ་ལྷག་དྲག་སྤྱོད་ལམ་ནས་རྐྱེན་ལམ་དུ་ཕྱིན་ཡོད། དེ་དག་མང་ཆེ་ཤོས་སྐྱེས་པ་རེད། འཛམ་གླིང་རྒྱལ་ཁབ་ཁག་གི་དམག་འཁྲུག་རིམ་པར་མཚོན་ན་ཡང༌། དྲག་འཐབ་བྱེད་མཁན་གྱི་དམག་མི་ཚོ་སྐྱེས་པ་ཡིན་ལ། ཚེ་སྲོག་ཤོར་མཁན་དག་ཀྱང་སྐྱེས་པ་ཆགས་ཡོད། བུད་མེད་ཚོ་རང་བཞིན་གྱིས་སྐྱེས་པ་ལས་སེམས་གཉོམ་ཞིང་ཉམ་ཆུང་བ། ཧམ་སེམས་དང་ང་རྒྱལ་དེ་ཙམ་མེད་པ་བཅས་ལྷན་སྐྱེས་ཀྱིས་ཞི་བདེ་དང༌། འཚེ་བ་མེད་པས་རྒྱུད་ཟིན་ཡོད་ཟེར་ཆོག་པ་རེད། དེར་བརྟེན། བུད་མེད་ཚོས་སྣེ་ཁྲིད་དེ་ཞི་བདེའི་ལས་འགུལ་སྤེལ་རྒྱུ་གལ་ཆེན་པོ་རེད། སྤྱི་ཚོགས་ནང་ཐད་ཀར་ནུས་པ་ཐོན་མཁན་ཡང་བུད་མེད་ཚོ་ཆགས་ཡོད།
ཚགས་ཤོག་འདི་དབྱར་དགུན་སྟོན་དཔྱིད་ཀྱི་དུས་ཚིགས་ལྟར་འདོན་རྩིས་ཡོད་པ་དང༌། ལེ་ཚན་གཙོ་བོ་ནི། ལོ་རྒྱུས་སྟེང་གི་བུད་མེད་མི་སྣ་གལ་ཆེན་ཁག་མཚམས་སྦྱོར་དང༌། བུད་མེད་ཀྱི་བསམ་བློའི་བསྒྲགས་གཏམ། སྤྱི་ཚོགས་དཔྱད་བརྗོད། སྙན་ངག་དང་ལྷུག་རྩོམ། སྒྲུང་ཐུང༌། བཅར་འདྲི། བསྒྱུར་རྩོམ། འཕྲིན་ཡིག བུད་མེད་དང་འབྲེལ་བའི་གསར་འགྱུར་ཐུང་ངུ་སོགས་ཀྱིས་གྲུབ་པའི་དུས་ཚིགས་ཚགས་ཤོག་ཅིག་ཡིན།
ཚགས་ཤོག་འདིའི་དམིགས་ཡུལ་ནི། བུད་མེད་རྣམས་སྤྱི་ཚོགས་ཀྱི་ཕྱེད་ཀ་ཡིན་པས། བུད་མེད་རྣམས་ཀྱི་ཤེས་ཡོན་དང་བསམ་བློ། སྤོབས་པ་དང་མདུན་བསྐྱོད། སྤྱི་ཚོགས་ཀྱི་འགན་འཁྲི་དང་ནུས་ཤུགས་བཅས་ཕྱོགས་ཡོངས་ནས་ཚད་གཞི་ཅན་དུ་བསྐུལ་རྒྱུ་དེ་ཡིན། ཡིན་ནའང༌། ཚགས་ཤོག་འདིས་མཚམས་རེར་བུད་མེད་ལ་བསྟོད་པ་བྱེད་སྲིད་ལ། སྐབས་རེར་སྐྱོན་བརྗོད་དགག་བཞག་ཀྱང་བྱེད་སྲིད་པ་རེད།
ཚགས་ཤོག་འདིའི་བྱེད་སྒོ་གཞན་ནི། ཚགས་ཤོག་འདིའི་ནང་གི་འབོལ་རྩོམ་གྲགས་ཤོས་དང༌། བསམ་ཚུལ་ཚ་ཤོས། སྙན་ངག་ཡག་ཤོས། གསར་འགྱུར་མཚར་ཤོས་བཅས་ཀྱི་བརྗོད་གཞིའི་སྒང་ལ་བུད་མེད་རྐྱང་རྐྱང་གིས་བགྲོ་གླེང་དང་དགག་སྒྲུབ་ཀྱི་བྱེད་སྒོ་ཡང་སྤེལ་རྒྱུ་ཡིན། བགྲོ་གླེང་གི་སྟེང་དུ་ཚགས་ཤོག་འདིའི་བརྗོད་སྙིང་དང་འབྲེལ་མེད་ཀྱི་བླ་ཆེན་མི་ཆེན། མགོ་བ་མགོ་མ་དེ་འདྲ་དོན་མེད་དུ་སྐད་གཏོང་གི་མིན། བགྲོ་གླེང་གི་བརྗོད་གཞི་དང་ཐད་ཀར་འབྲེལ་བའི་སྐྱེས་མ་སྐོར་ཞིག་དཔྱད་ཞིབ་ཀྱི་ངོ་བོར་སྐད་གཏོང་གི་ཡིན།
བསྒྱུར་རྩོམ་གྱི་ལེ་ཚན་ནང༌། ནུབ་ཕྱོགས་ཀྱི་སྐྱེས་མ་ཚོའི་འཇིག་རྟེན་ལྟ་ཚུལ་དང༌། སྤྱི་ཚོགས་འགན་ཁུར་གྱི་འདུ་ཤེས། བསམ་བློ་དང་སྒེར་ཚུགས་མཉམ་གནས་ཀྱི་ཚད་གཞི་ལྟ་བུའི་བསམ་བློ་དང་ཀུན་སྤྱོད་ཀྱི་གནད་དོན་ཉིང་བསྡུས་རེ་དགོད་པར་འབད་བརྩོན་བྱེད་རྒྱུ་ཡིན། དེ་ལྟར་བྱེད་དོན་ནི། ཚགས་ཤོག་འདིའི་སྟེང་ཤར་ནུབ་ཀྱི་སྐྱེས་མ་ཚོའི་བསམ་བློ་དཔྱད་བསྡུར་ཡོང་སའི་འབབ་སྟེགས་ཅིག་གྲུབ་ན་བསམ་པས་ཡིན།
ཚགས་ཤོག་འདིའི་སྟེང་དུ་དམིགས་བསལ་ཟེར་བ་དེ་གཏན་ནས་མེད། སུ་ཞིག་གི་རྩོམ་ཡིག་ལ་རིན་ཐང་ལྡན་ན་དེ་ཚགས་ཤོག་འདིར་དགོད་རྒྱུ་ཡིན། གལ་སྲིད་བུད་མེད་རྩོམ་འབྲི་མཁན་མ་བྱུང་བ་དང་ཚད་ལོན་གྱི་རྩོམ་ཡིག་མ་འབྱོར་ན། རེ་ཞིག་བུད་མེད་ཀྱི་བསམ་བློ་དང་ཤེས་ཡོན་གྱིས་མ་འདང་བའི་ངོ་བོར་བཞག་ནས་ཡོངས་ཁྱབ་གསལ་བསྒྲགས་དང་བཅས་ཚགས་ཤོག་འདི་རེ་ཞིག་འདོན་མཚམས་འཇོག་རྒྱུ་ཡིན། རྩོམ་ཡིག་གི་ཚད་གཞི་ཟེར་བ་དེ་ཡང་གཙོ་བོ་རྩོམ་པ་པོའི་བསམ་བློ་དང་རྣམ་དཔྱོད་དེ་ཚིག་སྦྱོར་གྱིས་གསལ་བོར་བསྟན་ཐུབ་ན་འགྲིག་པ་ཡིན།
གཞན་སྐྱེས་པ་ཕོ་ལུས་ལ་མཛད་པ་མོ་ལུས་ཀྱི་དཔེ་ལྟར། སྐྱེས་པ་བུད་མེད་ཀྱི་མིང་འོག་ན་རྩོམ་ཡིག་སྤེལ་མཁན་བྱུང་ན། རྩོམ་ཡིག་དེ་མ་ནིང་ཞེས་པའི་ལེ་ཚན་ནང་ལ་དགོད་རྒྱུ་ཡིན། སྐྱེས་པ་ཚོས། ཁ་ཆེན་དབང་ཆེན་ཁུར་ནས་ཚགས་ཤོག་འདི་གཅར་བརྡུང་བྱས་ན་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་པ་དང༌། ཁ་ཡག་ངོ་ཡག་གིས་རྒྱབ་སྐྱོར་བྱས་ཀྱང་དགའ་སྣང་དང་དང་ལེན་རྩ་བ་ནས་མེད། ཚགས་ཤོག་འདི་མིའི་བསམ་བློ་དང་རྣམ་དཔྱོད་ཡིན་པར་བརྩིས་ན་དེས་ཆོག
Subscribe to:
Posts (Atom)