མ་ཡུམ་རྩོམ་སྒྲིག་པ།

སློབ་སྟོན་པ། རྒྱལ་རོང་ཐུབ་བསྟན་ཆོས་སྒྲོན།
སྤྱི་ཁྱབ་རྩོམ་སྒྲིག་པ། མེ་འོད།
ལག་བསྟར་རྩོམ་སྒྲིག་པ། ཉི་མ་འཚོ། ཚེ་རིང་ཆོས་སྒྲོན།
རྩོམ་སྒྲིག་པ། འབྲོང་དར་རྒྱས། བྱ་སྨྱོན་པ།
འབྲེལ་མཐུད་པ། རྒྱལ་རོང་པདྨ།

དྲ་ངོས་ཀློག་གྲངས།

About Me

མ་ཡུམ།
མ་ཡུམ་ཞེས་པའི་དྲ་རྒྱ་འདི་ནི་བུད་མེད་རྐྱང་བའི་རྩོམ་པ་པོ་རྣམས་ཀྱི་ཆེད་དུ་ཡིན་པ་དང༌། གཙོ་བོ་བུད་མེད་རྣམས་ཀྱི་བསམ་བློ་བརྗེ་རེས་བྱེད་སའི་སྟེགས་བུ་ཞིག་དང༌། བུད་མེད་རྣམས་ཀྱི་འདས་པའི་བྱུང་བ་དང་ད་ལྟའི་གནས་བབ། མ་འོངས་པའི་ཕུགས་བསམ་བཅས་གསལ་སྟོན་བྱེད་སའི་རང་དབང་གི་སྟེགས་བུ་ཞིག་ཀྱང་ཡིན། དྲ་རྒྱ་འདི་བུད་མེད་རྒན་གཞོན་དང༌། བཙུན་མ། སློབ་ཕྲུག་ཡོངས་ལ་གཏན་དུ་དབང༌།
View my complete profile

དྲ་རྒྱ་བཟོ་བཀོད་པ་བསོད་ནམས་འོད་ཟེར།

འབྲེལ་གཏུགས་ཁ་བྱང་།

mayum2010@gmail.com

Blog Archive

ཟིན་བྲིས་འདིའི་བདག་དབང་ཆ་ཚང་མ་ཡུམ་དྲ་རྒྱ་ལ་ཡོད།. Powered by Blogger.

དཀར་ཆག


༥/༨ ཨ་མའི་དུས་ཆེན་ལ།

བོད་ཀྱི་མ་ཡུམ་ཚོ་གཙོས་པའི་གནམ་འོག་གི་ཨ་མ་ཚང་མར་འཚམས་འདྲི་ཞུ་བ་དང་། ཨ་མ་ཚོའི་མཐའ་མེད་པའི་བྱམས་སེམས་དང་གཏིང་ཟབ་པའི་བརྩེ་བ་ཡིས་འགྲོ་བ་མིའི་རིགས་ཀྱི་རང་བྱུང་ཁམས་ལ་བདེ་སྐྱིད་རྫོགས་ལྡན་ཐོབ་པར་སྨོན་འདུན་ཞུ།

Tuesday, August 30, 2011
     སྦེལ་ཀོབ་ནས་རྙེད་པའི་སྙན་ངག
 གཟུངས་ཕྱུག་སྐྱིད།
རི་བོ་མེད་པའི་ཐང་ཆེན་དག་ཇི་འདྲའི་ཆེ་ནའང
ངའི་མིག་ཟུང་གི་ཆུ་རིས་དག་སྐམ་ཚར་བས་ཡིན་ནམ
ལྗང་མདོག་གི་རྨི་ལམ་ལ་ངལ་གསོ་ཞིག་རྙེད་མ་བྱུང
ལྗོན་ཤིང་གི་ཡལ་ག་དག་ན་ཆུ་ཐིགས་འོད་ཀྲིག་ཀྲིག་བྱེད་ནའང
ང་རང་མཛའ་བརྩེ་ཞེས་པའི་ཡིག་འབྲུ་ཞིག་བོར་སོང་བའི་སྔ་ནུབ་ཏུ་འགྲེང་བཞིན
རྒྱང་དུ་འཕུར་སོང་བའི་བྱེའུ་ཚོགས་ཀྱི་གཤོག་སྒྲ་ཡང་ཡང་དྲན

བུ་མོའི་སྙིང་རྗེ་པོའི་བསམ་སྦྱོར་གཏམ་གསུམ།
                              འཇམ་དབྱངས་སྐྱིད།
      རྩོམ་པ་པོའི་གཏམ་ཐུང་ངུ༌། གྲོང་ཁྱེར་གྱི་ཕ་མ་ཚོས་རང་གི་བྱིས་པའི་ལུས་ཀྱི་སྟངས་སྟབས་དང་གདོང་གི་ཉམས་འགྱུར་པར་དུ་བླངས་ནས་དྲན་རྟེན་དུ་འཇོག་པ་རྒྱུན་པར་མཐོང༌། དེ་ནི་ལེགས་པོ་ཞིག་ཡིན་མོད་ཀྱི། སོ་སོའི་བྱིས་པའི་སེམས་ཁམས་ཀྱི་འགྱུར་བག་དང་མཚར་མཚར་གྱི་དྲི་བ། དྭངས་གཙང་གི་གཤིས་ཀ་བཅས་ཟིན་བྲིས་སུ་བཏབ་ན་དེ་བས་ཅི་མི་ལེགས་སམ།
Monday, August 29, 2011

 
ཁོ་མོའི་མིང་ལ་འཛམ་ལྷ་ཟེར་ཞིང་མོ་ལོ་བརྒྱད་ཅུ་གྱ་ལྔ་སླེབ་འདུག་ཕ་ཡུལ་ཁྱུང་མཆུ་རྫོང་རྨེ་བ་ཡུལ་ཤོག་
ནས་རེད།ཕྱི་ལོ་ཉིས་སྟོང་བཅུའི་དགུན་དུས་སུ་ཁྱུང་མྱུག་ཚོགས་པ་ཞེས་པའི་གྲྭ་རྐྱང་ལྷག་བསམ་གྱིས་ཕྱུག་པ་སྐོར་ཞིག་གིས་ས་དེར་བོད་ཡིག་རྨོངས་སེལ་གྱི་འཛིན་གྲྭ་སྒྲུབ་དུས་ལོ་ན་ཆེས་ཆེ་བའི་དབྱངས་གསལ་སྦྱོར་ཀློག་སློབ་མཁན་གྱི་སློབ་མ་རེད།ཕལ་ཆེར་ཟླ་བ་གཅིག་གི་རིང་ལ་ཉི་མ་རེ་རེ་བཞིན་སློབ་སྦྱོང་ལ་མ་ཆད་པར་ཡོང་སྟེ།དབྱངས་གསར་སོ་བཞི་འབྲི་ཀློག་གཉིས་ཀ་ཤེས་པར་གྱུར།ཁོ་མོའི་བཤད་རྒྱུར།ང་ནི་སྐྱེས་ནས་ད་ལ་མ་ཐུག་གི་བར་དུ་ཡི་གེ་སྦྱོང་བའི་གོ་སྐབས་རྙེད་མ་སོང་རྒྱས་པར་གཟིགས་འདོད་ན་འདི་ནོན།
Saturday, April 16, 2011
༡༤།༤།༡༡ ལ་མུ་ཏིག་གིས།
ཡུལ་ཤུལ་ལ་ས་ཡོམ་གྱི་གོད་ཆགས་བྱུང་ནས་ལོ་ངོ་གཅིག་འཁོར་བར།
འཇིག་རུང་གི་སྐྱ་རེངས་དེ་འདས་ནས། ལོ་ངོ་གཅིག་འདས་སོང་། ས་རྡུལ་དང་གྱང་རོ་ཁྲོད་ནས་བཞུད་ཟིན་པ་ཁྱེད་ཅག དངངས་སྐྲག་དང་ཕྱིར་མིག་གི་ཀློང་ནས་བཞུད་ཟིན་པ་ཁྱེད་ཅག གནམ་འོག་གི་ལན་ཆགས་ཡོད་ཚད་འཁུར་ནས། ད་བར་གང་ན་ཡོད།
ངོ་མདངས་ཤོར་བའི་ཕ་ཡུལ་དང་། ངུ་འབོད་ཆད་མ་མྱོང་བའི་ཤུལ་ལུས་ཚོའི་ཆེད་དུ། ཁྱེད་ཅག་གི་མིག་ཟུང་བཙུམ་མ་ཐུབ་དང་། རྣམ་ཤེས་བདེ་མ་ཐུབ་པ། ངས་སུ་ཞིག་ལ་དགོངས་དག་ཞུ་དགོས། བཞུད་ཟིན་པ་ཁྱེད་ཅག་ལ། མང་པོ་མང་པོ་ཞིག་ཆད་སོང་བ་ལྟ་བུའི་སེམས་ཚོར་ཞིག་གིས། དེ་རིང་། ཕ་ཡུལ་ལ་བལྟས་ནས་ངུ་བཞིན་ཡོད།


Thursday, April 7, 2011
      ཕྱི་ལོ་༢༠༡༡ལོའི་ཟླ༤བའི་ཚེས༣ཉིན།  མདོ་དབུས་ཁམས་གསུམ་གྱི་བུད་མེད་རྩོམ་རིག་པ་དང་བུད་མེད་ཀྱི་ལས་དབང་ལ་དོ་ཁུར་བྱེད་བཞིན་པའི་དགེ་སློབ་དག་གནའ་མཁར་ཟི་ལིང་དུ་མཉམ་འཛོམས་བྱུང་ནས་བུད་མེད་ཀྱི་གོ་གནས་སྐོར་བགློ་གླེང་བྱས་པ་དང་།  བུད་མེད་རྩོམ་རིག་པ་དག་ལ་བྱམས་བུད་མེད་རྩོམ་རིག་བྱ་དགའི་རྟགས་མ་གནང་།  བྱམས་བུད་མེད་རྩོམ་རིག་བྱ་དགའ་ནི་བོད་ཁུལ་གྱི་གསར་སྐྱེས་བུད་མེད་རྩོམ་པ་པོ་དག་ལ་དམིགས་ནས་བཙུགས་པའི་དགའ་རྟགས་ཤིག་ཡིན་ལ།  ཐེངས་འདིའི་མཛད་སྒོ་ནི་མཚོ་སྔོན་སྙིང་རྗེའི་བུད་མེད་ཚོགས་ཆུང་དང་།  ཀན་ལྷོ་ཁུལ་ན་གཞོན་སྙན་ངག་པའི་མཐུན་ཚོགས།  གངས་རིའི་བུ་མོའི་རྩོམ་སྒྲིག་ཁང་བཅས་ཀྱིས་གཙོ་སྒྲུབ་བྱས་པའི་བོད་རིགས་བུད་མེད་ཀྱི་གོ་གནས་དང་འཚོ་བ།  འཚར་ལོངས་ཀྱི་གོ་རིམ་བརྗོད་བྱ་ཡིན་པ་དང་།  གཙོ་བོ་སྙན་ངག་དང་ལྷུག་རྩོམ་སོགས་ཀྱི་རྩོམ་སྟངས་སྤྱད་ཡོད་པའི་རྩོམ་རིག་བརྩམས་ཆོས་གདམས་པའི་བྱ་འགུལ་ཞིག་ཡིན།
Friday, April 1, 2011

འདི་ནི་མ་ཡུམ་ཚོས་ནམ་རྒྱུན་མྱོང་བཞིན་པའི་བརྙས་བཅོས་ཤིག་རེད།
Saturday, February 19, 2011
ཨ་རི་ནས་ཡིན་པའི་ཨ་མ་སོ་ལན་མེན་ནི་ད་ལྟ་རང་ལོ་༣༥ཡིན་པ་དང༌། དེ་སྔོན་མོ་ལ་བུ་ཕྲུག་དྲུག་ཡོད་ཅིང༌། ཕྱི་ལོ་༢༠༠༩ལོའི་ཟླ་༡ ཚེས་༢༦ཉིན་མོ་ལ་བུ་དྲུག་དང་བུ་མོ་གཉིས་བཅས་ཕྲུ་གུ་བརྒྱད་མཉམ་གཅིག་ཏུ་སྐྱེས། ད་ལྟ་མོ་ལ་ཕྲུ་གུ་༡༤ཡོད། བརྙན་འཕྲིན་ཁང་ཞིག་ནས་ཁོ་མོར་ཨ་སྒོར་ཁྲི་༦༠སྤྲད་ཀྱང་ཡུན་ཐུང་ནང་རྫོགས་ཚར་བས། ད་ལྟ་མོ་ལ་སྡོད་ས་རྟེན་སའི་ཐད་དཀའ་ངལ་ཡོད་པའི་སྒང་ཡིན། དེ་བས་མོས་སྲིད་གཞུང་ལ་རོགས་སྐྱོར་ཡོང་བའི་རེ་སྐུལ་ཞུ་བར་གྲ་སྒྲིག་བྱེད་བཞིན་ཡོད་པ་མ་ཟད། སྲིད་གཞུང་གིས་རོགས་སྐྱོར་ཡོད་པར་མོས་ཡིད་ཆེས་དང་རེ་བའང་བྱེད་བཞིན་ཡོད།
Posted by Picasa
Monday, February 14, 2011
དྲི་བ། ཐོག་མར་ཁྱེད་ཀྱིས་རང་ཉིད་ངོ་སྤྲོད་ཅིག་གནང་རོགས།
ལན། ངའི་མིང་ལ་སུའུ་ནེ་ཏ་ཟེར་གྱི་ཡོད། ཕྱིས་སུ་དགེ་བཤེས་སྟོབས་རྒྱལ་ལགས་ཀྱིས་བློ་བཟང་སྒྲོལ་དཀར་ཟེར་བའི་བོད་མིང་ཞིག་གནང་བྱུང༌། དེ་ནས་བཟུང་བོད་པ་ཚང་མས་ང་ལ་སྒྲོལ་དཀར་ཟེར་གྱི་ཡོད། ང་རྒྱ་གར་ལྷོ་ཕྱོགས་མོན་གྷོ་ཊི་ནས་སྐྱེས་ཤིང༌། ཆུང་དུས་འཛིན་རིམ་ལྔ་པ་བར་སློབ་གྲྭར་འགྲོ་མྱོང༌།
Thursday, February 10, 2011
       འོ་ཐིགས། བྷེང་ལོར།
      བུད་མེད་ནི་གང་ལྟར་སྐྱེས་པ་ཚོའི་འཚོ་བ་དང་ འབྲལ་ཐབས་མེད་པའི་དབུགས་ཀྱི་རྒྱུ་བ་དེ་ཡིན་དགོས། སྐྱེས་པ་ཞིག་ལ་མཚོན་ན་བུད་མེད་ནི་རྙེད་དཀའ་བའི་ལེགས་སྐྱེས་ཤིག་དང་མཚུངས་ཤིང༌། བུད་མེད་ཡོད་པ་ནས་སྐྱེས་པ་ཚོའི་འཇིག་རྟེན་ལ་དུས་རྟག་ཏུ་སྤྲོ་སྣང་གསར་པའི་འཛུམ་བག་གིས་ཁེངས་ཡོད།
          ཀླུ་མོ་མཚོ། ནོར་གླིང་མཐོ་སློབ།
                  
    གཅིག རང་ཉིད་ཀྱི་སྟོང་ཆ་ཁ་སྐོང་བྱེད་རྒྱུ།
འདས་སོང་གི་ལོ་རྒྱུས་དང་ད་ལྟའི་བུད་མེད་ཀྱི་གནས་བབ་སོགས་ལ་ཞིབ་དཔྱོད་ཅིག་བྱས་པ་ཡིན་ན། ང་ཚོ་ཐུན་མོང་ལ་ལྟ་ཚུལ་ཞིག་ཡོད་པ་དེ་བུད་མེད་རང་ཉིད་ཀྱིས་མ་འཇོན་པ་དང་རང་སྟེང་གི་སྟོང་ཆ་དག་ཁ་སྐོང་བྱེད་མ་ཐུབ་པས། སྤྱི་ཚོགས་སྟེང་བུད་མེད་དམན་པར་འཛིན་པའི་འདུ་ཤེས་ཤིག་ཆགས་ཡོད་པར་བཤད།


      འཛམ་གླིང་གི་སྐྱེས་མ་བསམ་བློ་པ་ཐོག་མ་ཡིན་པའི་མ་ཅིག་ལབ་སྒྲོན་ནི་ཕྱི་ལོ་༡༠༣༡ལོར་གཡེ་ལབ་དུ་ཡབ་ཆོས་བློ་དང༌། ཡུམ་ཀླུངས་མོ་འབུམ་གཉིས་ཀྱི་སྲས་མོར་སྐུ་འཁྲུངས། རིམ་གྱིས་ནར་སོན་པ་ན་བློ་རིག་ཤིན་ཏུ་བཀྲ་བས་མཚན་ལའང་ཤེས་རབ་སྒྲོན་མེ་ཞེས་བཏགས། ཡུལ་དེའི་མངའ་བདག་གིས་བུ་མོ་དེ་བློ་རིག་ཁྱད་པར་ཅན་ཞིག་ཡིན་པ་གོ་ནས་གདན་བསུ་བྱས། ཡུལ་ལབ་ཕྱི་ནས་ཡིན་པ་དང་མཚན་ལ་ཤེས་རབ་སྒྲོན་མེ་ཡིན་པས་ན་ལབ་སྒྲོན་ཞེས་པའི་མཚན་འདི་བཏགས་པར་བཤད།

རྒྱ་རིགས་རྩོམ་པ་པོ་ཀྲང་ལིང་གྱིས་བརྩམས། མིག་དམར་ཆོས་སྒྲོན་གྱིས་རྒྱ་ཡིག་ལས་བསྒྱུར།
   དུས་རབས་ཉི་ཤུ་པའི་དུས་དཀྱིལ་ཙམ་ལ། རྒྱ་ནག་ཏུ་ཕུལ་དུ་བྱུང་བའི་སློབ་ཆེན་གྱི་སློབ་སྤྱི་ཞིག་ཡོད། སློབ་གྲྭ་དེར་ལོ་ལྟར་སློབ་མ་མང་པོ་བསྡུ་བཞིན་ཡོད་པས། ཁོང་ལ་ལྐོག་རྔན་ཕུལ་མཁན་དང་སྤྲེལ་ལད་འཁྲབ་མཁན་ཡང་མང་པོ་བྱུང༌། འོན་ཀྱང༌། ཁོང་གིས་ཁྱིམ་བདག་རྣམས་ལ་ཐུགས་རྗེ་ལེགས་འབུལ་ཞུ་བ་ལས། ལྐོག་རྔན་གཏན་ནས་བླངས་མྱོང་མེད། ཉིན་ཞིག་སློབ་སྤྱི་ཕྱི་རོལ་དུ་བསྐྱོད་སྐབས་ཁྱིམ་བདག་ཅིག་གིས་རིན་གོང་ཆེ་བའི་ཇ་སྐམ་ཤོག་ཁུག་ཅིག་དང་ཐ་མག་སྒམ་གཉིས་ཁོང་གི་ཁྱིམ་དུ་བསྐྱལ།

བསམ་གླིང་ཚེ་རིང་ལྷ་མོ།
ཁྱིམ་ཚང་ནི་སྤྱི་ཚོགས་ཆུང་ཆུང་ཞིག་ཡིན་པ་ཀུན་གྱིས་མཁྱེན་གསལ་རེད། སྐྱེ་བོ་སུ་འདྲ་ཡིན་རུང་རང་རང་གི་ཁྱིམ་ཚང་འགྲིམ་མ་མྱོང་བ་ཞིག་མེད་ལ་སྤྱི་ཚོགས་ཀྱི་ཁོར་ཡུག་ལེགས་ཉེས་གང་འདྲ་ཞིག་ལ་འགྱུར་མིན་དེ་ཡང་སྐྱེ་བོ་མི་རེ་ངོ་རེ་ལ་རག་ལས་ཡོད་པ་ཡིན། དེར་བརྟེན་ཁྱིམ་ཚང་སོ་སོ་ནས་རང་གི་བུ་ཕྲུག་གསོ་སྐྱོང་ཇི་ལྟར་གནང་དགོས་མིན་ནི་དེ་བས་གལ་ཆེའོ། །

མ་ཡུམ་དྲ་ཚིགས་ཀྱི་འཁྲུངས་སྐར་ལ་ཕུལ་བ། ཀླུ་སྨྱོན་ཧེ་རུ་ཀ

རང་བྱུང་ཁམས་ཆེན་པོ་ལྟ་བུའི་མ་ཡུམ་ཚོའི། ནམ་མཁའ་ལྟ་བུའི་བྱམས་བརྩེ་དང་། ས་གཞི་ལྟ་བུའི་ཕྱག་ཟུང་། རྒྱ་མཚོ་ལྟ་བུའི་སྤྱན་ཆབ་ཀྱིས་ཆེ་རུ་གསོས་པའི་ང་ཚོས། རང་གི་མ་ཡུམ་དག་ལ་དྲིན་ལན་ཅི་ཞིག་འཇལ་ཡོད། རང་གི་མ་ཡུམ་དག་གི་དྲིན་ལན་ཇི་ལྟར་འཇལ་རྩིས་ཡོད། ཀྱེ། བདག་གི་སྙིང་ཉེ་བའི་གྲོགས་པོ་དག

མ་ཡུམ་དྲ་བའི་དབུ་འབྱེད་ལ་བཅོས་མིན་སྙིང་ནས་རྟེན་འབྲེལ་ཞུ། ལྷ་ཆབ་སྦྱིན་པས།

རང་རེའི་བཙན་བྱོལ་སྤྱི་ཚོགས་འདི་འཁྲུག་ཆ་དོད་དུ་ཕྱིན་པ་དང་མཉམ་དུ་གཞུང་སྒེར་སྣ་ཚོགས་ཀྱི་རྩོམ་རིག་གི་དྲ་བ་སོགས་ཀྱང་དེ་བཞིན་དུ་ཆར་རྗེས་ཀྱི་ཤ་མོ་བཞིན་བརྡོལ་འོང་གི་འདུག འདས་པའི་ལོ་གཅིག་གི་ནང་ཚུན་ལ་ཡང་རྣམ་པ་མི་འདྲ་བའི་དྲ་བ་ཁག་དུ་མ་ཞིག་བྱུང་བའི་ཁྲོད་ཐད་ཀར་སྤྱི་ཚོགས་ལ་ཤུགས་རྐྱེན་ཡོད་པ་ཞིག་ཅི་བས་དཀོན་ནའང་། དེ་རིང་རྒྱལ་སྤྱིའི་སྐད་ཡིག་གི་ཉིན་མོར་སྟབས་བསྟུན་ནས་༼མ་ཡུམ༽ཞེས་པའི་དྲ་བ་འདི་བོད་རིགས་བུད་མེད་རྣམས་ལ་ཆེད་དུ་དམིགས་ནས་དབུ་འབྱེད་བྱས་པར་བཅོས་མིན་སྙིང་ནས་རྟེན་འབྲེལ་ཞུ་བ་དང་ཆབས་ཅིག་ཏུ། མ་འོངས་པར་འདི་དང་འདི་བརྒྱུད་ནས་བོད་རིགས་བུད་མེད་རྣམས་ཀྱིས་འདས་པའི་མེས་པོའི་སྲོལ་རྒྱུན་ལས་རང་གི་རིགས་ལ་དམའ་འབེབ་དང་མཐོང་ཆུང་ཅི་བྱས་ཀྱི་ཉམས་མྱོང་ལ་བརྟེན་ནས། གསར་གཏོད་དང་སྒྱུ་རྩལ། དམིགས་འབེན་ཡོད་པ་ཞིག་གི་ལམ་ཁ་སྙེག་ཐུབ་པའི་བཀྲ་ཤིས་བདེ་ལེགས་ཞུ།

མ༵་ཡུམ༵་དྲ་རྒྱ་ལ་ཕུལ་བའི་ཤིས་ཚིག་དང་འབོད་སྐུལ། དགེ་བཤེས་བེ་རི་འཇིགས་མེད།

མ༵་ཡུམ༵་གངས་ཅན་གྱི་ཞིང་ཁམས།། མ༵་རབས་རྒྱ་དམར་གྱིས་འཕྲོགས་ཀྱང་།། མ༵་འཁྱོགས་དྲང་ཐིག་གི་རི་མོ།། མ༵་ཆད་དྲ་ཐོག་ནས་གསལ་འོང་།། མ༵་ལོའི་འོ་མ༵་ཡིས་གསོས་པའི།། མ༵་སྤུན་བོད་རིགས་ཀྱི་མི་དམངས།། མ༵་བཅོས་སེམས་ཁམས་ཀྱི་རི་མོ།། མ༵་སྦས་དྲ་ཐོག་ལ་ཁོད་དང་།།

རྒན་བསོད་ནམས་རྒྱལ་མཚན་གྱིས་མ་ཡུམ་དྲ་ཚིགས་ལ་གནང་བའི་ཤིས་ཚིག

རྟེན་འབྲེལ་ཞུ། སེམས་ཁུང་གི་ཀུན་རྟོགས་ཀྱི་འདབ་མ་རེ་རེ། མཁའ་དབྱིངས་སུ་རྩེན་པའི་ཆུ་འཛིན་གཞོན་ནུ་དང་བསྡེབས་ནས། མཐའ་ཡས་པའི་བློ་གསར་པ་མང་པོ་ཞིག་གི་འདབ་མ་གྲོལ་བའི་སྨོན་འདུན་ཞུ།

ཨ་འཇམ་གྱིས་མ་ཡུམ་དྲ་བར་གནང་བའི་ཤིས་ཚིག

མ་ཡུམ་ནི་མིའི་རིགས་ཀྱི་གཙང་བོའི་འགོ་ཁུངས་ཤིག མ་ཡུམ་ནི་བྱམས་བརྩེའི་རྨང་གཞི་འདིང་མཁན་གྱི་ཞི་བདེའི་ནམ་མཁའ་ཞིག མ་ཡུམ་ནི་འཚོ་བའི་བར་སྣང་ཕྱེ་བའི་སྐྱ་རེངས་ཀྱི་སྒོ་གླགས་ཤིག འདི་ལྟར་མ་ཡུམ་ནི་འཚོ་གནས་ཀྱི་ཁོར་ཡུག་ནས་མེད་དུ་མི་རུང་བའི་མ་ཡུམ་ཞིག་སྟེ། འདི་ལྟར་མ་ཡུམ་གྱི་དྲ་རྒྱ་དབུ་བརྙེས་པ་ཡང་སྤྲོ་སེམས་ཁོལ་བའི་ངང་རྟེན་འབྲེལ་ཞུ། ༢༠༡༡ ༢ ༢༣ ལ་གོང་ས་ཏཱ་ལའི་བླ་མ་མཐོ་སློབ་ནས་ཨ་འཇམ་གྱིས།

མ་ཡུམ་དྲ་ཚིགས་ཀྱི་སྐྱེས་སྐར་ལ་ཕུལ་བའི་ཤིས་ཚིག གཟུངས་ཕྱུག་སྐྱིད།

རྒྱལ་ཡུམ་རྗེ་བཙུན་སྒྲོལ་མ་དག་སྣང་གིས་བཞེངས་ནས།། ཡུམ་ཆེན་བྲག་གི་སྲིན་མོའི་རྣམ་ཐར་ནས་བརྩམས་ཏེ།། མ་གཅིག་ལབ་ཀྱི་སྒྲོན་མའི་མཛད་རིམ་ལ་གཞིགས་ཚེ།། སྐྱེད་ཡུམ་ལྷ་མོའི་ཚོགས་ཀྱི་རྟོགས་བརྗོད་དེ་མཚར་ཨང་།། འབྲོ་བཟའ་ཁྲི་མ་ལོད་ཀྱི་དཔའ་མཛངས་དེ་བཙལ་ནས།། བཙན་མོ་སད་མ་ཀར་གྱི་བློ་བཀོད་ལ་བསྔགས་བཞིན།། ཚེ་སྤོང་མེ་ཏོག་བཟའ་ཡི་མཁྲེགས་འཛིན་ལ་བསམ་ན།། ན་རིམ་བཙུན་མོའི་ཚོགས་ཀྱི་ལོ་རྒྱུས་དེ་བརྗིད་ཨང་།། མྱང་ཚ་དཀར་རྒྱན་ཁྲོས་པའི་བློ་སྤོབས་ལ་དཔྱད་ཀྱིན།། ཨ་ཅེ་སྣང་ས་སྐྱོ་བའི་ངེས་འབྱུང་ལ་བརྟག་ནས།། གླིང་བཟའ་སེང་ལྕམ་འབྲུག་མོའི་སྐྱེས་འབྲས་ལ་བལྟས་ན།། གངས་ཅན་མ་ཡུམ་དག་གི་བཞུད་ལམ་འདི་རྨད་ཨང་།། བྱམས་བརྩེའི་དྲིན་གྱིས་བསྐྱངས་པའི་མ་རྒན་ནས་བརྩིས་ཏེ།། དགའ་བའི་འཛུམ་གྱིས་བསུ་མཁས་སྨན་ཤར་གྱི་གྲོགས་མོ།། འཇིག་རྟེན་བདེ་ལྡན་ཞིང་གི་ཁྱིམ་གཞིས་ལ་དཔག་ཚེ།། བདེ་སྦྱིན་མ་ཡུམ་ཚོགས་ཀྱི་དུངས་པ་དེ་འཕགས་ཨང་།། ད་ཡང་འཇིག་རྟེན་མི་ཡི་གྲལ་འགོ་ནས་ལངས་ཏེ།། ཤར་ནུབ་འཛམ་གླིང་ཟླུམ་པོའི་དཀྱིལ་དབུས་སུ་ཕེབས་ནས།། ༼མ་ཡུམ་དྲ་ཚིགས༽སྒེག་མོ་ལྷུག་ལྷུག་ཏུ་དགད་ཚེ།། ཕྱོགས་ཀྱི་མགྲོན་པོའི་ངག་གི་རམ་འདེགས་འདི་མཛེས་ཨང་།། ཞེས་པ་འདི་གསར་དུ་སྒོ་འབྱེད་གནང་བའི་མ་ཡུམ་དྲ་ཚིགས་ཀྱི་སྐྱེས་སྐར་ལ་བཀྲ་ཤིས་ཁ་བཏགས་ཤིག་གི་ཚུལ་དུ་གཟུངས་ཕྱུག་སྐྱིད་ཀྱིས་སྤྱི་ལོ་༢༠༡༡ལོའི་ཟླ་༢པའི་ཚེས་༢༡ཉིན་རྡ་རམ་ས་ལར་བྲིས།

མ་ཡུམ་དྲ་ཚིགས་ལ་ཕུལ་བའི་ཤིས་ཚིག་བཀྲ་ཤིས་འཁོར་ལོ་མ། ཐོར་རྒོད་པ་སྤྱན་ཆབ།

  ཁྱོད་ཀྱིས་གསུངས་པའི་རྨི་ལམ་དྭངས་མོ་གཅིག། ང་ལ་ཡོད་པའི་དམིགས་ཀྱི་རི་མོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་ཚིག་གི་ལྷ་ཡིས་ངེད་གཉིས་སྲུངས།།  ཁྱོད་ཀྱིས་བསྙལ་བའི་ལོ་ཆང་བསིལ་མ་གཅིག། ང་ཡིས་འདོད་པའི་བཟི་ཁ་བཙན་པོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་བདུད་རྩི་མཆོད་པའི་ངེད་གཉིས་བསྟོད།།  ཁྱོད་ཀྱིས་བོར་པའི་ཞེ་མདང་མདུད་པ་གཅིག། ང་ལ་མངའ་བའི་མགུལ་ལེ་དྲོན་མོ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བཀྲ་ཤིས་རྫས་ཀྱི་ཐག་པས་ངེད་གཉིས་ཆོངས།།  ཕྱི་ན་བཀྲ་ཤིས་འཛུམ་ཀྱི་མངར་ཁ་གཅིག། ནང་ན་བཀྲ་ཤིས་ཕན་པའི་དྲོད་ཁོལ་གཉིས།། བཀྲ་ཤིས་གནམ་ལོ་གསར་བའི་དུས་བཟང་ལ།། བོད་ཀྱི་མ་ཡུམ་དྲ་ཚིགས་ཁྲི་ལོར་ཤོག

ཐུགས་རྗེ་ཆེ་ཞུ།

ཁེ་ན་ཌ་གནས་བཞུགས་དྲ་རྒྱ་སྒྲིག་སྦྱོར་ཆེད་མཁས་པ་བསོད་ནམས་འོད་ཟེར་ལགས་ཀྱིས་ལྷག་བསམ་རྣམ་དག་གིས་ང་ཚོར་དྲ་བའི་མཐུན་རྐྱེན་དང་། དྲ་ཚིགས་སྒྲིག་སྦྱོར་ཐོག་ལམ་སྟོན་རོགས་རམ་གནང་བ་བཅས་ལ་སྙིང་ཁོངས་རུས་པའི་གཏིང་ནས་བཀའ་དྲིན་ཆེ་ཞུ། མ་ཡུམ་རྩོམ་སྒྲིག་པས།